ஜிம்பாப்வே அணியின் முன்னாள் வேகப்பந்துவீச்சாளரான ஹென்றி ஒலொங்கா, கிரிக்கெட்டில் இருந்து ஓய்வெடுத்த பிறகு, க்ரூய்ஸ் கப்பல்கள், ஓய்வூதியர் குடியிருப்பு பகுதிகள், பள்ளி மாணவர்கள் மற்றும் சிறிய பார்கள் என கொஞ்சம் பேர் இருந்தாலும் பாடல்கள் பாடி வருவதாக தெரிவித்துள்ளார். கடந்த 10 ஆண்டுகளில் அவரது வாழ்க்கை முற்றிலுமாக மாறிவிட்டதென அவர் கூறுகிறார்.

ஒலொங்காவுக்கு இசையில் ஆர்வம் எப்போதுமே இருந்தது. 24 ஆண்டுகளுக்கு முன், ராபர்ட் முகாபே ஆட்சி காலத்தில் நிலங்களை பிடிக்க வன்முறைகள் நடந்து கொண்டிருந்தபோது, அவர் எழுதிய “Our Zimbabwe” என்ற பாடல் வெளியானது.

ஒலொங்கா கடைசியாக 2008ஆம் ஆண்டு நியூசிலாந்தில் ஒரு டி20 போட்டியில் விளையாடினார். அதன்பிறகு ஓய்வு பெற்று பலவகையான வேலைகளை செய்தார்.

சமீபத்தில் அவர் வெளியிட்ட ஒரு பாடலில்

நான் தொலைவிலே சென்றாலும்
என் ஆன்மா என் மண்ணையே நாடும்.
நேரமும் தூரமும் நம்மை பிரித்தாலும்,
என் இதயம் அவளையே பிடித்திருக்கும்,
நாம் அனைவரும் நம் தேசத்தை உருவாக்க
ஒன்றாக நிற்போம்,
இது நம் நிலம்,
நம் ஜிம்பாப்வே,”

என்று தெரிவித்துள்ளார்.

“இந்த பாடலை இன்று மீண்டும் கேட்டால், அது எனக்கு உணர்ச்சி வசப்படும் ஒரு அனுபவமாகவே இருக்கிறது,” என ஒலொங்கா கூறினார்.

2003 உலகக்கோப்பையில், முன்னாள் வீரர் ஆண்டி பிளவர் உடன் சேர்ந்து ஒலோங்கா ‘நாட்டில் ஜனநாயகம் இறந்துவிட்டது’ என்னும் எதிர்ப்புக்குரலை பதிவு செய்ய கருப்பு கைப்பட்டி அணிந்தனர். இதற்குப் பின்னர், ஒலொங்காவுக்கு மரண மிரட்டல்கள் வந்தன, அணி பஸ்ஸிலிருந்து தள்ளப்பட்டார், பின்னர் ஜிம்பாப்வேயிலிருந்து தப்பி ஓட நேர்ந்தது.

“‘Our Zimbabwe’ என்பது மக்களை ஒன்று சேர்க்கும் அழைப்பு. நான் எப்போதும் அமைதியை விரும்பும் நபராக இருந்தேன், ஆனால் சிலர் என்னை எதிர்மறையாகவே பார்க்கிறார்கள். ஆனால் என் பாடல் வரிகளை பாருங்கள், நான் செய்த விஷயங்களை பாருங்கள், நான் மக்களுக்கு நல்வழி காட்ட முயன்றதே,” என ஒலொங்கா கூறினார்.

“நான் குற்றம் சுமத்தவே இல்லை. நம் நாடாகவும், அரசியல்வாதியாகவும், குடிமகனாகவும் நம்மால் சிறந்தவர்களாக இருக்க முடியும், இதுதான் அந்த கருப்பு கைப்பட்டி எதிர்ப்பின் நோக்கம்,” என்றார்.

22 ஆண்டுகளுக்குப் பிறகு இன்று தொடங்கிய இங்கிலாந்து மற்றும் ஜிம்பாவே அணிகளுக்கு இடையிலான டெஸ்ட் போட்டியில் ஒலோங்கா ஒரு நிகழ்ச்சியில் பங்கேற்றார்.

“எனக்கு ஒரு வாய்ப்பு கிடைத்தது, ஒரு ஸ்டேஜ் கிடைத்தது. அதை வைத்து சாதிக்கலாம் என நம்பினேன். ஆனால், கொரோனா காரணமாக அது சும்மா போயிற்று,” என அவர் கூறினார். அவர் பங்கேற்ற ரியாலிட்டி ஷோ ஒன்றும் நிறுத்தப்பட்டது.

“க்ரூய்ஸ் கப்பலில் பாடுவது இசை உலகத்தின் உச்சமாக இல்லையென்று சிலர் நினைக்கிறார்கள். சிலர் கூட, ‘ஓர் பாடகர் எங்கேயும் வெற்றிபெறாதபோது தான் கப்பலுக்கு போவார்’ என்று கூட சொல்கிறார்கள்,” என அவர் நகைச்சுவையாக கூறினார்.

ஒலொங்கா, ஜிம்பாப்வே கிரிக்கெட் வரலாற்றில் முதல் கறுப்பின மேடை டெஸ்ட் வீரர், மற்றும் மிகக்குறைந்த வயதில் அறிமுகமானவர். அவர் டெஸ்ட் அரங்கில் முதன்முறையாக விளையாடிய போது அவருக்கு வெறும் 18 வயதுதான்.

ஜிம்பாவே கிரிக்கெட் அணியில் மறக்க முடியாத வீரராக விளங்கிய ஒலோங்கா இன்று மக்களை இசை மூலம் மகிழ்ச்சிப்படுத்தி வருகிறார்.

ஒரு கொசுறு தகவல்: கிரிக்கெடை ஆழ்ந்து ரசிக்கும் ரசிகர்களுக்கு ஒலோங்கா என்று சொன்னவுடன் ஒரு சம்பவம் ஞாபகம் வரும். கடந்த 1998 ஆம் ஆண்டு கோகோ கோலா கிரிக்கெட் போட்டி நடைபெற்ற நிலையில் முதல் போட்டியில் சஞ்சய் சச்சின் டெண்டுல்கரை மிக குறைந்த ரன்னில் ஒலோங்கா அவுட் ஆக்கினார். சச்சின் விக்கெட்டை எடுத்ததும் அவர் குதித்ததை பார்த்து அனைவரும் ஆச்சரியமடைந்தனர். ஆனால் அடுத்த போட்டியில் சச்சின் டெண்டுல்கர் ஒலோங்காவுக்கு மிகப்பெரிய தண்டனை கொடுத்தார். 92 பந்துகளில் 124 ரன்கள் அடித்தார் என்பதும் அதில் 6 சிக்சர்கள், 12 பவுண்டரிகள் அடங்கும் என்பதும், அதில் பெரும்பாலான ரன்கள் ஒலோங்கா பந்தில் தான் அடித்தார் என்பதும் குறிப்பிடத்தக்கது.