‘ऑपरेशन सिंदूर’चा संदेश जगभरात पोहोचवण्यासाठी निघालेल्या हिंदुस्थान सरकारच्या खासदारांच्या शिष्टमंडळांपैकी डीएमके खासदार कनिमोळी यांच्या नेतृत्वाखालील एक शिष्टमंडळ आज रशियाची राजधानी मॉस्को येथे दाखल झाले. परंतु विमान रशियाच्या हवाई हद्दीत पोहोचताच युक्रेनने ड्रोन हल्ले केले. युक्रेनचे ड्रोन आकाशातच भिरभिरत होते. त्यामुळे विमानाला तब्बल 40 मिनिटे आकाशातच घिरट्या घालाव्या लागल्या. अखेर धोका टळल्यानंतर विमानाचे लँडिंग करण्यात आले.

मॉस्कोपासून जवळपास 400 किलोमीटर दूरवर येलेट्स शहरावर युक्रेनने अनेक ड्रोन्स डागले. या हल्ल्यांचा रशियाच्या तब्बल 153 विमान उड्डाणांवर परिणाम झाल्याचे वृत्त आहे. त्यामुळे हजारो प्रवाशांची प्रचंड गैरसोय झाली. मॉस्कोच्या शेरमेत्येवो, डोमोडेडोवो, झुकोवस्की आणि बोनुकोवो या विमानतळांवरील विमान उड्डाणे अनिश्चित काळासाठी थांबवण्यात आल्याचे रशियाच्या रोसावियात्सिया या हवाई सेवा संस्थेने म्हटले आहे.

रशिया, स्पेनसह पाच देशांचा दौरा करणार

डीएमके खासदार कनिमोळी यांच्या नेतृत्वाखालील हे शिष्टमंडळ रशिया, स्पेनसह पाच देशांचा दौरा करणार आहे. मॉस्कोमध्ये आज हिंदुस्थानी राजदूत विनय कुमार यांनी शिष्टमंडळाचे स्वागत केले. तसेच हिंदुस्थान आणि रशियातील द्विपक्षीय संबंधांबाबतची माहिती दिली. शिष्टमंडळात राजीव राय, कॅप्टन ब्रिजेश चौटा, प्रेम चंद गुप्ता, अशोक मित्तल आणि राजदूत मंजीव पुरी यांचा समावेश आहे. रशियानंतर हे शिष्टमंडळ स्लोवेनिया, ग्रीस, लातविया आणि स्पेन येथे जाणार आहे.

– या घटनेनंतर रशियाच्या अधिकाऱ्यांनी देशाच्या हवाई संरक्षण दलाने रात्रभर 105 ड्रोन पाडल्याचा दावा केला. यात 26 ड्रोन मॉस्कोच्या दिशेने उडत होते. पाडलेल्या ड्रोनचे अवशेष दिसत आहेत.