इंडियन प्रीमियर लीग २०२५ स्पर्धेत शुक्रवारी (२३ मे) ६५ व्या सामन्यात सनरायझर्स हैदराबादने रॉयल चॅलेंजर्स बंगळुरूला ४२ धावांनी पराभूत केले. त्यामुळे बंगळुरूने शुक्रवारी पाँइंट्स टेबलमध्ये अव्वल स्थानी जाण्याची संधी गमावली.

बंगळुरूचा हा चौथा पराभव आहे. त्यामुळे ते १७ गुणांवरच कायम राहिले असले तरी नेट रनरेट खालवल्याने ते दुसऱ्यावरून तिसऱ्या क्रमांकावर घसरले आहेत. हैदराबादला मात्र २ गुण मिळाले असल्याने त्यांचे आता १३ सामन्यांनंतर ११ गुण झाले आहेत. पण ते ८ व्या क्रमांकावर कायम आहेत.

आता हैदराबादला अखेरचा सामना बाकी आहे, तर प्लेऑफपूर्वी अखेरचा साखळी सामना अद्याप खेळायचा आहे.

दरम्यान, लखनौमध्ये शुक्रवारी झालेल्या सामन्यात रॉयल चॅलेंजर्स बंगळुरूसमोर विजयासाठी २३२ धावांचे लक्ष्य ठेवले होते. या लक्ष्याचा पाठलाग करताना बंगळुरूचा संघ १९.५ षटकात १८९ धावांवर सर्वबाद झाला. हैदराबादसाठी फलंदाजीनंतर गोलंदाजीतीलही सांघिक कामगिरी महत्त्वाची ठरली.

बंगळुरूकडून विराट कोहली आणि फिल सॉल्ट यांनी सलामीला फलंदाजी केली होती. त्यांनी सुरुवातीपासूनच आक्रमक खेळ करताना हैदराबादच्या गोलंदाजांना दबावात आणले होते. त्यांनी पॉवरप्लेच्या ६ षटकांमध्ये १० हून अधिकच्या धावगतीने धावा केल्या. यादरम्यान नोबॉलमुळे सॉल्टला जीवदानही मिळाले, ज्याचा त्याने चांगलाच फायदा घेतला.

विराट आणि सॉल्ट यांनी ७ षटकात ८० धावांची भागीदारी करत बंगळरूचा चांगली सुरुवात दिली होती. ७ व्या षटकाच्या शेवटच्या चेंडूवर विराटला हर्ष दुबेने अभिषेक शर्माच्या हातून झेलबाद केले. विराटने २५ चेंडूत ७ चौकार आणि १ षटकारासह ४३ धावांची खेळी केली.

पण त्यानंतर मयंक अगरवाल एका बाजूने सॉल्टला साथ देत होता. सॉल्टने आक्रमक अर्धशतकही केले. त्याच्यात आणि मयंकमध्ये ४० धावांची भागीदारी झाली. पण ११ व्या षटकात मयंकला ११ धावांवर नितीश रेड्डीने इशान किशनच्या हातून झेलबाद केले.

पाठोपाठ पुढच्याच षटकात सॉल्टला पॅट कमिन्सने हर्षल पटेलच्या हातून झेलबाद करत बंगळुरूला मोठा धक्का दिला. सॉल्टने ३२ चेंडूत ४ चौकार आणि ५ षटकारांसह ६२ धावांची खेळी केली.