उन्हाळ्यात अशी अनेक फळे उपलब्ध असतात जी तुम्हाला ताजेतवाने ठेवतात आणि त्याचबरोबर हायड्रेटेड देखील ठेवतात. लिची हे अशाच फळांपैकी एक आहे, जे उन्हाळ्यात बरेच लोक खूप आवडीने खातात. अनेकांना त्याची आंबटगोड चव आवडते. लिची खाण्याचे अनेक फायदे आहेत. लिचीमध्ये भरपूर पाणी असते , ज्यामुळे उन्हाळ्याच्या दिवसात शरीर हायड्रेटेड राहण्यास मदत होते . मात्र, सध्याच्या भेसळीच्या या युगात, बाजारात मिळणाऱ्या फळे आणि भाज्यांमध्ये अनेकदा भेसळ आढळते, जी आपल्या आरोग्याला हानी पोहोचवू शकते. अशा परिस्थितीत, अस्सल आणि बनावट पदार्थ ओळखणे फार महत्वाचे आहे. आज या लेखात जाणून घेऊयात काही अशा टिप्स ज्यांच्या मदतीने तुम्ही खरी आणि बनावट लिची सहज ओळखू शकता.
लिची खरेदी करताना नेहमीच त्यांचा वास घ्यावा. ताज्या आणि शुद्ध लिचींना सौम्य, फळांचा गोड सुगंध असतो. दुसरीकडे, जर लिचीला रसायनासारखा किंवा कुबट वास येत असेल, तर समजून घ्या की त्यात रसायने मिसळली आहेत. हा वास कृत्रिम रंग, केरोसीन किंवा लिचीमध्ये वापरल्या जाणाऱ्या कृत्रिम प्रिझर्वेटिव्हजचा असू शकतो, जो खाण्यास हानिकारक ठरू शकतो.
लिची खरेदी करताना एखादे फळ सोलून घ्या आणि तिचा गर काळजीपूर्वक पहा. जर लिची नैसर्गिक असेल तर तिचा आतील भाग पांढरा, पारदर्शक, रसाळ आणि सुगंधित असेल. त्याच वेळी, जर गर लाल रंगाचा असेल किंवा कोरडा असेल, तर हे फळ काही कृत्रिम पदार्थांच्या संपर्कात आले असण्याची शक्यता आहे.
एका भांड्यात स्वच्छ पाण्यात काही लिची घ्या. खऱ्या आणि नैसर्गिकरित्या पिकलेल्या लिची पाण्याचा रंग न बदलता बुडतील किंवा तरंगतील. जर पाणी लाल किंवा गुलाबी होऊ लागले तर त्यात कृत्रिम रंग किंवा रसायने वापरली असल्याचे हे लक्षण असू शकते.
खरी लिची ओळखण्याचा सर्वात सोपा मार्ग म्हणजे ती ओल्या टिशू किंवा कापसाच्या बॉलने घासणे. जर फळाचा रंग फिकट पडला तर त्यावर कृत्रिम रंगाचा लेप असण्याची शक्यता आहे. ही सोपी पद्धत तुम्हाला नकली लिची खाण्यापूर्वी ओळखण्यास मदत करू शकते, विशेषतः जर तुम्ही त्या मोठ्या प्रमाणात खरेदी केल्या असतील तर.
तुम्ही खऱ्या आणि बनावट लिचीला स्पर्श करूनही ओळखू शकता. यासाठी तुम्हाला फक्त लिचीच्या सालीला स्पर्श करावा लागेल. खऱ्या लिचीची साल खडबडीत असते, आणि तिची साल थोडीशी जाडसर असते. दुसरीकडे, जर फळ स्पर्शास गुळगुळीत, मेणासारखे किंवा निसरडे वाटत असेल, तर त्यावर मेण किंवा तेलाचा लेप लावलेला असू शकतो.
हेही वाचा : Cannes Film Festival : ऊत पोहोचला कान्स चित्रपट महोत्सवात
संपादित – तनवी गुडे
