हिंदुस्थानचा जागतिक बुद्धिबळ विजेता डी गुकेशने ‘नॉर्वे बुद्धिबळ 2025’ स्पर्धेत सुरूवात काहीशी खराब झाली होती. मात्र, गुकेशने तिसऱ्या फेरीत अमेरिकेच्या हिकारू नाकामुराला हरवून पहिला विजय मिळवला होता आणि आता 19 व्या वाढदिवशी त्याने स्वतालाच बर्थ डे गिफ्ट देत चौथ्या फेरीत जागतिक क्रमवारीत पाचव्या स्थानावर असलेल्या अमेरिकेच्या फॅबियानो कारुआनाला टाय-ब्रेक सामन्यात पराभूत करून आणखी एक विजय नोंदवला.

स्पर्धेच्या सुरूवातीला गुकेशला अव्वल स्थानावर असलेल्या मॅग्नस कार्लसन आणि नंतर देशबांधव अर्जुन इरिगॅसीविरुद्ध सलग दोन पराभव पत्करावे लागले होते. मात्र, त्यानंतर दमदार पुनरागमन करत हिकारू आणि फॅबियानोला पराभूत केले. अमेरिकेच्या फॅबियानोविरुद्ध पांढऱ्या मोहऱ्यांसह सामना अनिर्णित ठेवला. नंतर नियमांनुसार कोणत्याही किंमतीत टायब्रेकमध्ये पांढऱ्या मोहऱ्यांसह जिंकणे आवश्यक असल्याने त्याने झुकेटों र्ट ओपनिंगचा अवलंब केला. 15 व्या चालीनंतर कारुआना मध्यभागी गुकेशच्या अतिरिक्त मोहऱ्याच्या हालचालींचे योग्य मूल्यांकन करू शकला नाही आणि गुकेशने आघाडी घेतली. 50 चालींपर्यंत चाललेल्या सामन्यात गुकेशने शानदार विजय नोंदवला. या विजयासह गुकेश आता 4.5 गुणांसह चौथ्या स्थानावर पोहोचला आहे.

मॅग्नस कार्लसनने हिंदुस्थानच्या अर्जुन एरिगाईसीला सरळ क्लासिकल सामन्यात हरवले आणि 8 गुणांसह आघाडी घेतली. तर दुसऱ्या सामन्यात अमेरिकेचा हिकारू नाकामुरा चीनच्या वेई यीकडून टायब्रेकमध्ये पराभूत झाला. पराभव झाल्यानंतरही फॅबियानो 7 गुणांसह दुसऱ्या स्थानावर आहे. तर, हिकारू 5.5 गुणांसह तिसऱ्या स्थानावर आहे.

महिला गटात, हिंदुस्थानच्या कोनेरू हम्पीला टाय-ब्रेकमध्ये विश्वविजेत्या जू वेन्जुनकडून पराभव पत्करावा लागला. तर आर वैशालीने टाय-ब्रेकमध्ये युक्रेनच्या अण्णा मुझीचुकचा पराभव केला. हम्पी आणि अण्णा दोघेही सध्या 7 गुणांसह एकमेव आघाडीवर आहेत, तर या विजयामुळे वैशालीचे स्थान निश्चितच सुधारले आहे.