मुंबई : आर्थिक वर्ष २०२५ च्या शेवटच्या तिमाहीत (जानेवारी-मार्च) भारतीय अर्थव्यवस्थेने उत्तम कामगिरी केली. मार्च तिमाहीत भारताचा जीडीपी (India GDP) वाढ ७.४% राहिली आहे. गेल्या चार तिमाहींमधील ही वाढ सर्वाधिक आहे. त्याच वेळी संपूर्ण आर्थिक वर्ष २०२५ मध्ये देशाचा जीडीपी (India GDP Growth Rate) ६.५ टक्के दराने वाढला. शुक्रवारी, ३० मे रोजी जारी केलेल्या आकडेवारीत सरकारने ही माहिती दिली.



देशाच्या अर्थव्यवस्थेत मागील तिमाहीच्या तुलनेत वाढ दिसून आली. ऑक्टोबर-डिसेंबर तिमाहीत जीडीपी वाढ 6.4% होती. मात्र, मागील आर्थिक वर्षाच्या मार्च तिमाहीत जीडीपी वाढीचा दर ८.४% असल्याने वार्षिक आधारावर हा विकास दर कमी होता.



जागतिक आर्थिक वातावरणात अनिश्चितता असूनही भारताच्या आर्थिक विकासाची गती कायम राहील, असे अर्थतज्ज्ञांचे मत आहे. असा अंदाज आहे की आर्थिक वर्ष २०२५-२६ मध्ये जीडीपी वाढ ६.३% असू शकते. तर महागाई दर ३.७% पर्यंत कमी होऊ शकतो. मागील वर्षाच्या तुलनेत नाममात्र जीडीपी ९.८% ने वाढून ३३०.६८ लाख कोटींवर पोहोचला. तर स्थिर किमतींवर वास्तविक जीडीपी १८७.९७ लाख कोटींवर पोहोचला. केवळ चौथ्या तिमाहीत नाममात्र जीडीपी १०.८% ने वाढून ८८.१८ लाख कोटी रुपये झाला.

राष्ट्रीय सांख्यिकी कार्यालयाने जारी केलेल्या आकडेवारीत या विस्तारामागील मुख्य घटकांवर प्रकाश टाकण्यात आला आहे. उत्पादन क्षेत्राने ९.४% वार्षिक वाढीसह आघाडी घेतली, त्यानंतर सार्वजनिक प्रशासन, संरक्षण आणि इतर सेवा ८.९% आणि वित्तीय, रिअल इस्टेट आणि व्यवसाय सेवा ७.२% ने वाढल्या. चौथ्या तिमाहीत उत्पादन क्षेत्राची वाढ आणखी वाढली आणि ते १०.८% पर्यंत पोहोचले.



देशांतर्गत मागणीचे मापक असलेल्या खाजगी वापरात वर्षभरात ७.२% वाढ झाली. सकल स्थिर भांडवल निर्मितीमध्येही लवचिकता दिसून आली, ती वार्षिक ७.१% आणि चौथ्या तिमाहीत ९.४% ने वाढली. खाणकामासह प्राथमिक क्षेत्र ४.४% ने वाढले. चौथ्या तिमाहीत त्यात ५% ची तीव्र वाढ दिसून आली. तर गेल्या वर्षी याच तिमाहीत ती फक्त ०.८% होती.