मुंबई : ब्रुअरीज आणि डिस्टिलरीज क्षेत्रातील कंपनी इंडिया ग्लायकोल्स लिमिटेडने शुक्रवार, ३० मे रोजी एक मोठी घोषणा केली आहे. कंपनीने शेअरचे विभाजन म्हणजेच स्टाॅक स्प्लिटची (India Glycols Limited stock split) घोषणा केली आहे. ग्लायकोल्स लिमिटेडने १० रुपयांच्या दर्शनी मूल्याच्या एका शेअरचे १:२ असे विभाजन करून ५ रुपयांच्या दोन शेअर्समध्ये विभाजन करण्यास मान्यता दिली आहे.



कंपनीने म्हटले आहे की या स्टॉक स्प्लिटची रेकॉर्ड तारीख नंतर जाहीर केली जाईल. आतापर्यंत इंडिया ग्लायकोल्सने कोणतेही बोनस शेअर्स दिलेले नाहीत. तसेच यापूर्वी कोणतेही स्टॉक स्प्लिट केलेले नाही, म्हणजेच कंपनीचे हे पहिले स्टॉक स्प्लिट असेल.



स्टॉक स्प्लिट का केले जाते?

जेव्हा एखाद्या कंपनीचा शेअर खूप महाग होतो, तेव्हा कंपनी शेअर स्प्लिट करते आणि शेअर लहान भागांमध्ये विभागते. यामुळे शेअर्सची किंमत कमी होते आणि नवीन गुंतवणूकदारांना शेअर्स खरेदी करणे सोपे होते. याव्यतिरिक्त यामुळे बाजारात शेअर्सच्या व्यवहारालाही गती मिळते.

शेअर्सचा परतावा

शुक्रवारी शेअर विभाजनाच्या बातमीनंतर इंडिया ग्लायकोल्सचे शेअर्स घसरून १,८८५ रुपयांवर बंद जाला. २०२५ च्या सुरुवातीपासून या शेअर्समध्ये सुमारे ४६% वाढ झाली आहे. शेअर्सने १ वर्षात १५०%, २ वर्षात २०५%, ३ वर्षांत ११६% आणि ५ वर्षांत ६०२% परतावा दिला आहे.



मार्केट कॅप

सध्या कंपनीचे मार्केट कॅप ५,८६५.५० कोटी रुपये आहे. गेल्या एका वर्षात शेअर्सने 685 रुपयांचा नीचांकी आणि 1,945 रुपयांचा वरचा स्तर गाठला आहे. शेअर विभाजनानंतर कंपनीचे एकूण अधिकृत भांडवल ४५ कोटी रुपये असेल, जे आता प्रत्येकी ५ रुपयांच्या ९ कोटी शेअर्समध्ये विभागले जाईल.