आपल्यापैकी बहुतेक जण दिवसाचा बराचसा वेळ स्क्रीनसमोर बसून घालवतात. मग ती संगणकाची स्क्रीन असो किंवा मोबाईलची स्क्रीन. तासन्तास डिजिटल स्क्रीनसमोर बसल्याने आपल्या डोळ्यांवर सर्वात वाईट परिणाम होतो. यामुळे ताण, निद्रानाश आणि इतर अनेक आजारांचा धोका वाढतो. डोळ्यांशी संबंधित या समस्येला डिजिटल आय स्ट्रेन म्हणतात. डिजिटल आय स्ट्रेनला पूर्वी कॉम्प्युटर व्हिजन सिंड्रोम म्हणून ओळखले जात असे. हा आजार सध्या दिवसेंदिवस लोकांमध्ये वाढत चालला आहे.

पूर्वी फक्त संगणकावर काम केले जात असे पण आता लॅपटॉप, टॅब्लेट, स्मार्ट फोन हे देखील आपल्या जीवनाचा एक अविभाज्य आणि महत्त्वाचा भाग बनले आहेत. या डिव्हाईसेसचा जास्त वापर केल्याने डिजिटल आय स्ट्रेनची समस्या उद्भवते. या आजाराची सुरूवात होत असताना डोळ्यांमध्ये सौम्य वेदना सुरू होऊ शकतात. परंतु जर वेळेवर उपचार केले गेले नाहीत तर भविष्यात दृष्टी देखील जाऊ शकते.

डिजिटल आय स्ट्रेनची सुरुवातीची लक्षणे

डोळ्यांमध्ये ताण जाणवणे, डोळ्यांतून पाणी येणे, वेदना निर्माण होणे, अंधुक दिसणे, लालसरपणा निर्माण होणे ही डिजिटल आय स्ट्रेनची सुरुवातीची लक्षणे आहेत. यासोबतच डोकेदुखी आणि अस्वस्थता देखील निर्माण होऊ शकते. कधीकधी ते चिडचिडेपणाचे कारण देखील असू शकते. सकाळी उठल्यानंतर तुम्हाला कमी वेदना जाणवण्याची शक्यता असते, परंतु जसजसा दिवस पुढे जातो तसतशा या वेदना वाढू लागतात.

प्रतिबंध आणि उपचार

1. डिजिटल, इलेक्ट्रॉनिक डिव्हाईसेस वापरणे ही आपली गरज बनली आहे. अशा परिस्थितीत, आपल्याला त्यांचा वापर कसा करायचा हे देखील माहित असले पाहिजे. या वस्तू डोळ्यांपासून खूप जवळ किंवा दूर ठेवून वापरणे धोकादायक ठरू शकते. या वस्तू विशिष्ट अंतरावर ठेवूनच वापरल्या पाहिजेत.

2. ज्या खोलीत तुम्ही या गोष्टी वापरत आहात त्या खोलीत पुरेसा प्रकाश असावा. अन्यथा, डोळ्यांवर ताण येऊ शकतो.

3. ऑफिसमध्ये एसी व्हेंटसमोर बसू नये. यामुळे डोळ्यांतील अश्रू सुकतात. 20-20-20 हा नियम पाळला पाहिजे. ऑफिसमध्ये संगणक आणि लॅपटॉपवर जास्त वेळ काम करणाऱ्या लोकांनी दर 20 मिनिटांनी 20 फूट अंतरावर असलेल्या वस्तूकडे 20 सेकंदांसाठी पहावे. यामुळे डोळ्यांवरील ताण कमी होतो.

4. डिव्हाईसची स्क्रीन खूप उजळ नसावी आणि फॉन्टचा आकारही खूप लहान नसावा.

5. जेव्हा तुम्ही संगणकावर जास्त वेळ काम करता तेव्हा तुमच्या पापण्या एका मिनिटात फक्त 6-8 वेळाच लुकलुकतात तर 16-18 वेळा डोळे मिचकावणे सामान्य आहे. डोळ्यांचे आरोग्य कायम राखण्यासाठी दर सहा महिन्यांनी एकदा डोळे तपासणे आवश्यक आहे.

हेही वाचा : Upgrade Yourself : प्रत्येक कामात परफेक्ट होणे गरजेचे

संपादित – तनवी गुडे