मंगळवारी (३ जून) १८ वर्षांच्या प्रतिक्षेनंतर अखेर रॉयल चॅलेंजर्स बंगळुरू संघाचं स्वप्न सत्यात उतरलं. रजत पाटिदारच्या नेतृत्वात बंगळुरूने आयपीएल २०२५ पर्वाची ट्रॉफी उंचावली. संपूर्ण हंगामात सातत्यपूर्ण कामगिरी करत अंतिम सामन्यात धडक बंगळुरूने मारली होती.

अहमदाबादमधील नरेंद्र मोदी स्टेडियममध्ये झालेल्या अंतिम सामन्यात बंगळुरूने पंजाब किंग्सला ६ धावांनी पराभूत करत पहिल्यांदाच आयपीएलच्या जेतेपदावर नाव कोरले. या विजयानंतर जगभरातून त्यांचे अभिनंदन होत आहे. अनेक आजी - माजी क्रिकेटपटूंनी, तसेच विविध क्षेत्रातील व्यक्तींनीही बंगळुरूचे कौतुक केले आहे.

बंगळुरूचा कर्णधार सांगितले की हे विजेतेपद विराट कोहलीसाठी आहे. विराट गेली १८ हंगाम बंगळुरूकडून खेळत आहे. त्याने आत्तापर्यंत अनेक मोठे विजेतेपद जिंकले, पण हे एकमेव विजेतेपद त्याच्याकडे नव्हते. पण आता तो आयपीएल विजेता देखील ठरला आहे. बंगळुरूच्या या विजेतेपदाच्या सेलिब्रेशनमध्ये विराटचे मित्र, संघसहकारी आणि बंगळुरूचे माजी क्रिकेटपटू एबी डिविलियर्स आणि ख्रिस गेल हे देखील सामील झाले होते.

बंगळुरूच्या या विजयाचे कौतुक करताना मास्टर-ब्लास्टर सचिन तेंडुलकरने पोस्ट केले की 'रॉयल चॅलेंजर्स बंगळुरू तुमचं पहिल्या आयपीएल विजेतेपदाबद्दल अभिनंदन. १८ व्या पर्वाची ट्रॉफी १८ क्रमांकाच्या जर्सीच्या खेळाडू उचलणे, हा एक सुंदर संयोग आहे. चांगले खेळलात आणि तुम्ही विजेतेपदासाठी पात्र होता. पंजाब किंग्स तुम्ही सुद्धा खूप चांगले खेळलात. तुम्हीही या हंगामात चांगली लढत दिली.'