भारताची कॉपी करण्याचा प्रयत्न करणाऱ्या पाकिस्तानची अमेरिकेत चांगलीच फजिती झाली आहे. भारताने विविध देशांमध्ये आपल्या खासदारांचे शिष्टमंडळ पाठवले. त्यानंतर पाकिस्ताननेही शिष्टमंडळ पाठवले. परंतु अमेरिकेत पाकिस्तानच्या या शिष्टमंडळाला दहशतवादावर चार कठोर बोल ऐकावे लागले. बिलावल भुट्टो झरदारी यांच्या नेतृत्वाखालील पाकिस्तानी शिष्टमंडळाला अमेरिकेतील खासदाराने सांगितले की, तुम्ही दहशतवादी गट जैश-ए-मोहम्मदचा खात्मा करा. तसेच धार्मिक अल्पसंख्याकांची सुरक्षा सुनिश्चित करण्यासाठी प्रयत्न करावे. वरिष्ठ खासदार ब्रॅड शेरमन यांनी पाकिस्तानला हा कडक संदेश दिला.
वॉशिंग्टनमध्ये पाकिस्तानचे माजी परराष्ट्र मंत्री बिलावल भुट्टो झरदारी यांच्या नेतृत्वाखालील पाकिस्तानी शिष्टमंडळाने शेरमन यांची भेट घेतली. त्यावेळी ब्रॅड शेरमन म्हणाले की, पाकिस्तानने दहशतवादी संघटनेचा पूर्णपणे नायनाट करण्यासाठी सर्व शक्य पावले उचलली पाहिजेत. त्यांनी जैश-ए-मोहम्मद या दहशतवादी संघटनेविरुद्ध निर्णायक कारवाई करावी. वॉल स्ट्रीट जर्नलचे पत्रकार डॅनियल पर्ल यांच्या हत्येसाठी ही संघटना जबाबदार असल्याचे त्यांनी सांगितले.
बिलावल यांना हे कठोर बोल काँग्रेस खासदार शशी थरूर यांच्या नेतृत्वाखालील शिष्टमंडळ वॉशिंग्टनमध्ये असतानाच ऐकावे लागले. थरुरु ‘ऑपरेशन सिंदूर’ आणि पहलगाममधील दहशतवादी हल्ल्याबत पाकिस्तान समर्थित दहशतवादी जबाबदार असल्याचे अमेरिकेत सांगत होते. ब्रॅड शेरमन यांनी सोशल मीडिया प्लॅटफॉर्म एक्स वर लिहिले की, मी पाकिस्तानी शिष्टमंडळाला दहशतवादाविरुद्धच्या लढाईचे महत्त्व सांगितले. विशेषतः २००२ मध्ये माझ्या मतदारसंघातील रहिवासी डॅनियल पर्लची हत्या करणाऱ्या जैश-ए-मोहम्मद गटाविरुद्ध कारवाई करण्याचे सांगितले. ओसामा बिन लादेनला ठार मारण्यास अमेरिकेला मदत केल्याबद्दल तुरुंगात असलेल्या डॉ. शकील आफ्रिदीची सुटका करण्याचा प्रश्नही शेरमन यांनी उपस्थित केला. ते म्हणाले की, डॉ. आफ्रिदीची सुटका करणे हे ९/११ च्या पीडितांसाठी एक महत्त्वाचे पाऊल ठरणार आहे.
बिलावल भुट्टो यांनी शिष्टमंडळासह न्यू यॉर्कमध्ये संयुक्त राष्ट्रांचे सरचिटणीस अँटोनियो गुटेरेस आणि सुरक्षा परिषदेच्या राजदूतांची भेट घेतली. यावेळी त्यांनी काश्मीर प्रश्नाचे आंतरराष्ट्रीयीकरण करण्यासाठी आणि भारतासोबतचा संघर्ष सोडवण्यासाठी मदतीची याचना केली. परंतु त्यांनी दहशतवाद निपटण्याचा सल्ला देण्यात आला.
