கோவையில் நடைபெற்று வரும் டிஎன்பிஎல் 2025 சீஸன் இரண்டாவது போட்டியில், சேப்பாக் சூப்பர் கில்லிஸ், ஐடிரீம் திருப்பூர் தமிழன்ஸ் அணிகள் நேற்று இரவு மோதினார்கள். திருப்பூர் அணி முதலில் பேட்டிங் செய்தது. முதல் ஓவரிலேயே அபிஷேக் தன்வார் பந்து வீச்சில், திருப்பூர் அணியின் ஓப்பனிங் பேட்ஸ்மேன் அமித் சாத்விக் அவுட்டானார்.

பவர்பிளே முடிவில் அந்த அணி 46 ரன்கள் எடுத்தது. மறுபக்கம் துஷார் ரஹேஜா நிலைத்து நின்று ஆடினார். இதனால் அந்த அணிக்கு மிடில் ஓவர்களில் நல்ல ரன்கள் கிடைத்தன.

ரஹேஜா 43 பந்துகளில் 79 ரன்கள் எடுத்து அவுட் ஆனார். அவரது விக்கெட்டுக்கு பிறகு திருப்பூர் அணியின் ரன் ரேட் மீண்டும் குறைந்தது. 20 ஓவர்கள் முடிவில் அந்த அணி 173 ரன்கள் எடுத்தது. சேப்பாக் அணி சார்பில் அபிஷேக், விஜய் சங்கர் தலா 2 விக்கெட்கள் எடுத்தனர்.

174 ரன்கள் இலக்குடன் களமிறங்கிய சேப்பாக், ஆரம்பம் முதலே அதிரடி காட்டியது. அந்த அணியின் ஒரு ஓப்பனரான ஆஷிக் 2 ரன்களில் அவுட்டானாலும், அந்த அணியின் மற்றொரு ஓப்பனர் மோகித் ஹரிஹரன் 22 பந்துகளில் 46 ரன் எடுத்து நல்ல ஸ்டார்ட் கொடுத்தார்.

மிடில் ஓவர்களில் சேப்பாக் கேப்டன் அபராஜித், விஜய் சங்கர் பவுண்டரிகளை விளாசினர். அபராஜித் கடைசி வரை ஆட்டமிழக்காமல் 48 பந்துகளில் 77 ரன்களும், விஜய் சங்கர் 23 பந்துகளில் 41 ரன்களும் எடுத்தனர். இதன் மூலம் 16 ஓவர்கள் முடிவிலேயே சேப்பாக் அணி இலக்கை எட்டி வெற்றி பெற்றது.

திருப்பூர் அணி சார்பில் பௌலிங்கில் மிகவும் எதிர்பார்க்கப்பட்ட டி. நடராஜன் 2 ஓவர்களில் 26 ரன்கள் விட்டுக் கொடுத்தார். நட்டுவின் துல்லிய யார்க்கர்கள் மிஸ் ஆனது. இதனால் அவரின் பௌலிங்கில் விக்கெட்கள் வராமல் பவுண்டரிகள் அதிகம் சென்றன.

திருப்பூர் அணிக்கு அந்த அணியின் கேப்டன் சாய் கிஷோர் மட்டுமே சற்று நன்கு பௌலிங் செய்தார். மறுபக்கம் கடந்த ஐபிஎல் சீஸனில் சென்னை சூப்பர் கிங்ஸ் அணிக்காக விளையாடிய விஜய் சங்கருக்கு சற்று சுமாரான சீஸனாகவே இருந்தது. வாய்ப்பு கிடைத்தபோதும் அவரின் ஸ்ட்ரைக் ரேட் விமர்சனத்துக்குள்ளானது.

இந்தப் போட்டியில் பௌலிங்கில் 2 விக்கெட்டுகள் எடுத்ததுடன் பேட்டிங்கில் 180 – 200 ஸ்ட்ரைக்  ரைட்டில் ஆடினார். முக்கியமாக விஜய், அபராஜித்துடன் இணைந்து 3வது விக்கெட்டுக்கு 105 ரன்கள் அமைத்த பார்ட்னர் ஷிப், சேப்பாக் அணிக்கு அசத்தலான வெற்றியை கொடுத்தது.!

சினிமா விகடனின் பிரத்யேக Whatsapp க்ரூப்

சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள...

உங்கள் வாட்ஸ் அப் மூலமே இணைந்திருங்கள் சினிமா விகடனுடன்...