बाजारातून कोणताही खाद्यपदार्थ खरेदी करताना, तुमच्या लक्षात आले असेल की त्याच्या मागे एक्सपायरी डेट किंवा बेस्ट बीफोर डेट लिहिलेली असते. तुम्हाला त्यांचा अर्थ माहित आहे का? बऱ्याच जणांना या दोन्ही तारखा सारख्याच वाटतात. जर तुम्हीही त्या सारख्याच मानत असाल, तर तुम्ही चुकताय. कारण या दोन्ही तारखा पूर्णपणे भिन्न आहेत आणि त्यांचा अर्थ देखील वेगळा आहे. एक्सपायरी डेट आणि बेस्ट बिफोर डेट (Expiry Date vs Best Before Date) मध्ये नेमका फरक काय आहे ते पाहूयात.
एक्सपायरी डेट म्हणजे ज्या तारखेनंतर उत्पादन वापरण्यास सुरक्षित मानले जात नाही ती तारीख. ही तारीख प्रामुख्याने औषधे आणि अन्नपदार्थांवर लिहिलेली असते. याचा अर्थ असा की या तारखेनंतर हे उत्पादन वापरणे आरोग्यासाठी हानिकारक असू शकते. एक्सपायरी डेटनंतर, ब्रेड इत्यादी अन्नपदार्थांमध्ये बुरशी वाढू शकते, ज्यामुळे अन्न विषबाधा होऊ शकते.
बेस्ट बीफोर डेट म्हणजे ज्या तारखेनंतर उत्पादनाची सर्वोत्तम चव किंवा गुणवत्ता कमी होऊ शकते, परंतु याचा अर्थ असा नाही की ते खराब झाले आहे. ही तारीख बहुतेकदा कोरडे अन्न, पॅकेज केलेल्या वस्तू आणि सौंदर्यप्रसाधनांवर लिहिलेली असते. या तारखेवरून एवढेच समजते की या तारखेनंतर या उत्पादनाच्या चव, पोत, रंग किंवा वासात काही बदल होऊ शकतो, परंतु जर उत्पादनात असा कोणताही बदल झाला नाही तर ते वापरले जाऊ शकते.
उत्पादनाचा वापर बेस्ट बीफोर डेटनंतरही करता येतो, परंतु काही गोष्टी लक्षात ठेवा, जसे की पॅकेट सुजले असेल किंवा त्यातून विचित्र वास येत असेल तर ते खाऊ नका. जर उत्पादनाची चव किंवा रंग बदलला असेल तर ते फेकून द्यावे. जर उत्पादन योग्यरित्या साठवले गेले असेल (जसे की हवाबंद डब्यात), आणि ते बराच काळ टिकू शकते, तर ते वापरले जाऊ शकते. मात्र जर तुम्हाला उत्पादनाच्या एक्सपायरी डेट किंवा बेस्ट बीफोर डेटबद्दल काही शंका असेल, तर सुरक्षितता लक्षात घेऊन ती वस्तू वापरू नका.
हेही वाचा : Healthy Sleeping Habits : लवकर झोपण्याचे आरोग्यदायी फायदे
संपादित – तनवी गुडे
