मुंबई : भारतीय शेअर बाजार आज ९ जून रोजी सलग चौथ्या दिवशी वधारून बंद झाले. सेन्सेक्स २५६ अंकांनी वधारला. निफ्टीने २५,१०० चा आकडा ओलांडला. यामुळे आज गुंतवणूकदारांच्या संपत्तीत ४ लाख कोटी रुपयांची वाढ झाली. जागतिक बाजारपेठेतील मजबूत संकेत आणि आरबीआयच्या अलिकडच्या निर्णयांमुळे बाजारातील भावना उंचावल्या राहिल्या.
बीएसई स्मॉलकॅप निर्देशांक १.१९ टक्क्यांनी आणि मिडकॅप निर्देशांक १.०३ टक्क्यांनी वधारला. क्षेत्रीय निर्देशांकांत रिअल्टी क्षेत्र वगळता इतर सर्व क्षेत्रीय निर्देशांक वधारून बंद झाले. आयटी, बँकिंग आणि मीडिया शेअर्समध्ये सर्वाधिक वाढ दिसून आली. बँक निफ्टीने आज व्यवहारादरम्यान पहिल्यांदाच ५७,००० चा टप्पा ओलांडत नवीन सार्वकालिक उच्चांक गाठला. व्यवहाराच्या शेवटी सेन्सेक्स २५६.२२ अंकांनी वाढून ८२,४४५.२१ वर बंद झाला. तर निफ्टी १००.१५ अंकांनी किंवा ०.४०% ने वाढून २५,१०३.२० रुपयांवर पोहोचला.
आज ६ जून रोजी बीएसईवर सूचीबद्ध कंपन्यांचे एकूण बाजार भांडवल ४५५.०८ लाख कोटी रुपयांवर पोहोचले, जे मागील व्यवहार दिवशी म्हणजेच गुरुवार, ५ जून रोजी ४५१.१३ लाख कोटी रुपये होते. अशाप्रकारे, बीएसईवर सूचीबद्ध कंपन्यांचे बाजार भांडवल ३.९५ लाख कोटी रुपयांनी वाढले आहे. दुसऱ्या शब्दांत गुंतवणूकदारांच्या संपत्तीत सुमारे ३.९५ लाख कोटी रुपयांची वाढ झाली आहे.
बीएसई सेन्सेक्समधील ३० पैकी २२ शेअर्स वाढीसह बंद झाले. यामध्ये, कोटक महिंद्रा बँकेच्या शेअर्समध्ये सर्वाधिक ३.२० टक्के वाढ झाली. यानंतर, बजाज फायनान्स, अ‍ॅक्सिस बँक, पॉवर ग्रिड आणि इंडसइंड बँकेचे शेअर्स १.६० टक्क्यांपासून २.५१ टक्क्यांपर्यंत वाढीसह बंद झाले.
तर सेन्सेक्सचे उर्वरित ८ शेअर्स घसरून बंद झाले. यामध्ये इटरनल सर्वाधिक १.८९ टक्क्यांनी घसरला. तसेच आयसीआयसीआय बँक, टायटन, महिंद्रा अँड महिंद्रा (एम अँड एम) आणि अदानी पोर्ट्सचे शेअर्सही घसरले.
