मुंबई : आघाडीची सौर पंप उत्पादक कंपनी ओसवाल पंप्स या आठवड्यात त्यांचा आयपीओ (Oswal Pumps IPO) आणणार आहे. कंपनीने आयपीओसाठी किंमत पट्टा ५८४ रुपये ते ६१४ रुपये प्रति शेअर असा निश्चित केला आहे. हा आयपीओ १३ जून रोजी सबस्क्रिप्शनसाठी खुला होईल आणि १७ जून रोजी बंद होईल. अँकर गुंतवणूकदारांसाठी आयपीओ एक दिवस आधी म्हणजे गुरुवारी १२ जूनला उघडेल. या आयपीओला ग्रे मार्केटमध्ये जबरदस्त प्रतिसाद मिळत आहे. त्यामुळे लिस्टिंगलाच गुंतवणूकदारांना मजबूत नफा मिळेल.



इतक्या शेअर्सची विक्री

ओसवाल पंप्स आयपीओमधून ८९० कोटी रुपये उभारणार आहे. यामध्ये १.४५ कोटी नवीन शेअर्स विकले जातील. तर आॅफर फाॅर सेलमध्ये कंपनीचे एक प्रवर्तक विवेक गुप्ता ८१ लाख शेअर्स विकतील. त्यांचा सध्या कंपनीत २५.१७% हिस्सा आहे. त्यांचा हिस्सा विकून मिळणारे पैसे कंपनीला नाही तर प्रमोटरला जातील.



लाॅट आकार

गुंतवणूकदार या आयपीओमध्ये किमान २४ शेअर्सच्या लॉट (Oswal Pumps IPO lot size) साठी आणि त्यांच्या पटीत बोली लावू शकतात. कमाल किंमत लक्षात घेता एका लॉटसाठी म्हणजेच २४ शेअर्ससाठी १४,०१६ रुपये आवश्यक असतील. एक किरकोळ गुंतवणूकदार जास्तीत जास्त १४ लॉटसाठी म्हणजेच २८८ शेअर्ससाठी १,९६,२२४ रुपयांपर्यंत बोली लावू शकतो.

ओसवाल पंप्स आयपीओ जीएमपी

मंगळवारी १० जून रोजी ओसवाल पंप्स आयपीओचा ग्रे मार्केट प्रीमियम (Oswal Pumps IPO gmp) ४७.५ रुपयांवर आहे. याचा अर्थ, ओसवाल पंप्सचे शेअर्स ६६१ रुपयांना सूचीबद्ध होऊ शकतात. लिस्टिंगलाच गुंतवणूकदारांना मोठा नफा मिळण्याची शक्यता आहे.



लिस्टिंग या दिवशी

शेअर्स वाटपाची प्रक्रिया १८ जून २०२५ पर्यंत पूर्ण होण्याची अपेक्षा आहे. तर ओसवाल पंप्सचे शेअर्स २० जून २०२५ रोजी एनएसई आणि बीएसईवर सूचीबद्ध होतील. कंपनीने एकूण शेअर्सपैकी ५०% पात्र संस्थात्मक खरेदीदारांसाठी (क्यूआयबी) राखीव ठेवले आहेत. तर १५% संस्थात्मक नसलेल्या खरेदीदारांसाठी (एनआयआय) आणि ३५% किरकोळ गुंतवणूकदारांसाठी राखीव ठेवले आहेत. एमयूएफजी इनटाइम इंडिया (पूर्वी लिंक इनटाइम इंडिया) ही या आयपीओची रजिस्ट्रार आहे. आयआयएफएल कॅपिटल सर्व्हिसेस, अ‍ॅक्सिस कॅपिटल, सीएलएसए इंडिया, जेएम फायनान्शियल आणि नुवामा वेल्थ मॅनेजमेंट हे त्यांचे बुक रनिंग लीड मॅनेजर आहेत.

निधी कुठे वापरणार

कंपनी नवीन शेअर्सच्या विक्रीतून ८९.८६ कोटी रुपये भांडवली खर्च (कॅपेक्स) निधीसाठी वापरेल. त्याच वेळी त्यांच्या पूर्ण मालकीच्या उपकंपनी ओसवाल सोलरमध्ये इक्विटीच्या स्वरूपात २७२.७५ कोटी रुपये गुंतवण्याची आणि हरियाणातील कर्नाल येथे नवीन उत्पादन युनिट्सच्या स्थापनेसाठी वित्तपुरवठा करण्याची योजना आहे. याशिवाय, कंपनीच्या काही कर्जांच्या अंशतः किंवा पूर्ण परतफेडीसाठी २८० कोटी रुपये वापरले जातील. तर ओसवाल सोलरने घेतलेल्या कर्जाची परतफेड करण्यासाठी ३१ कोटी रुपये वापरले जातील. उर्वरित रक्कम सामान्य कॉर्पोरेट उद्देशांसाठी असेल.



कंपनी काय करते?

ओसवाल पंप्सची स्थापना २००३ मध्ये झाली. कंपनी सौरऊर्जेवर चालणारे आणि ग्रिड-कनेक्टेड सबमर्सिबल आणि मोनोब्लॉक पंप, इंडक्शन आणि सबमर्सिबल मोटर्स आणि सोलर मॉड्यूल्सचे उत्पादन करते. हे 'ओसवाल' ब्रँड अंतर्गत विकले जातात. हे कृषी, गृहनिर्माण, व्यावसायिक (जसे की मॉल, कार्यालये, हॉटेल्स) आणि विविध उद्योगांच्या गरजा पूर्ण करते. कंपनीचा उत्पादन कारखाना हरियाणातील कर्नाल येथे आहे.

आर्थिक कामगिरी

आर्थिक वर्ष २०२३-२४ मध्ये कंपनीचे कामकाजातून उत्पन्न ७५८.५ कोटी रुपये होते. गेल्या वर्षीच्या ३८५ कोटींपेक्षा ही ९७% वाढ आहे. याच कालावधीत कंपनीचा निव्वळ नफा ९७.६ कोटी रुपये होता. हे आर्थिक वर्ष २३ मधील ३४.१ कोटी रुपयांपेक्षा जवळजवळ तिप्पट आहे.