जिल्हाध्यक्ष निवडीवेळी सीतामढी येथे दोन गटात हाणामारी

वृत्तसंस्था/ पाटणा

बिहारमधील सीतामढी येथील राष्ट्रीय जनता दलाच्या (आरजेडी) कार्यालयातून एक व्हिडिओ समोर आला असून जो मोठ्या प्रमाणात व्हायरल होत आहे. व्हायरल व्हिडिओमध्ये दोन गट एकमेकांशी हाणामारी करताना दिसत आहेत. आरजेडी जिल्हाध्यक्ष निवडीदरम्यान दोन गटांमध्ये जोरदार राडा झाल्याचे वृत्त आहे. याप्रसंगी बाजपट्टीचे आमदार मुकेश यादव देखील उपस्थित होते. तसेच सीतामढीचे माजी खासदार अर्जुन राय देखील घटनास्थळी उपस्थित होते. स्थानिक कार्यकर्ते वरिष्ठ नेत्यांसमोरच हाणामारी करताना दिसत आहेत. यादरम्यान आमदारही संतप्त दिसले.

राष्ट्रीय जनता दलाच्या जिल्हाध्यक्षपदाची निवड प्रक्रिया सुरू असताना पक्षातील कार्यकर्त्यांनी एकमेकांना हाणामारी आणि धक्काबुक्की करण्यास सुरुवात केली. या संपूर्ण प्रकरणाचा व्हिडिओ व्हायरल झाल्यानंतर पुन्हा एकदा पक्षातील बेशिस्त वर्तनाबद्दल प्रश्न उपस्थित केले जात आहेत.

या वर्षाच्या अखेरीस बिहारमध्ये विधानसभा निवडणुका होणार आहेत. निवडणूक आयोगाने अद्याप कोणतीही तारीख जाहीर केली नसली तरी आगामी निवडणुका पाहता विविध पक्षांनी मोर्चेबांधणी सुरू केल्याचे दिसून येत आहे. तेजस्वी यादव यांच्या नेतृत्वाखाली आरजेडी यावर्षी विधानसभा निवडणुका लढवणार आहे. आरजेडी अनेक वर्षांपासून सत्तेबाहेर आहे. यापूर्वी जेडीयूसोबत युती करून आरजेडी सरकारमध्ये होते. तथापि, आता हा पक्ष आता स्वबळावर सरकार बनवू पाहत आहे.