वर्ल्ड टेस्ट चॅम्पियनशीप स्पर्धेचे तिसरे पर्व (२०२३-२५) शनिवारी संपले. दक्षिण आफ्रिकेने लॉर्ड्स क्रिकेट ग्राऊंडवर झालेल्या अंतिम सामन्यात शनिवारी ऑस्ट्रेलियाविरुद्ध विजय मिळवत तिसऱ्या पर्वाचे विजेतेपद पटकावले. दक्षिण आफ्रिका वर्ल्ड टेस्ट चॅम्पियनशीप स्पर्धेचे तिसरे विजेते ठरले. दरम्यान, त्यांच्या विजयासह तिसरं पर्व संपलं.

आता लगेचच चौथ्या पर्वाला म्हणजे वर्ल्ड टेस्ट चॅम्पियनशीप २०२५-२७ स्पर्धेला सुरुवात होणार आहे. येत्या वर्ल्ड टेस्ट चॅम्पियनशीपच्या चौथ्या पर्वात ९ संघांमध्ये एकूण ७१ सामने खेळले जाणार आहे.

१७ जून रोजी श्रीलंका आणि बांगलादेश यांच्यात सुरू होणाऱ्या कसोटी मालिकेने चौथ्या पर्वाची सुरुवात होईल. त्यानंतर लगेचच २० जूनपासून भारताला इंग्लंडविरुद्ध ५ सामन्यांची कसोटी मालिका खेळायची आहे. हे मालिकाही चौथ्या पर्वाचा भाग असून दोन्ही संघ या मालिकेपासून नव्या पर्वातील आपल्या मोहिमेला सुरुवात करणार आहेत. तसेच या मालिकेपासून शुभमन गिलच्या कसोटी नेतृत्वालाही सुरुवात होणार आहे.

आगामी चौथ्या पर्वात सर्वाधिक कसोटी सामने ऑस्ट्रेलिया संघ खेळणार आहे. ते दोन वर्षात २२ कसोटी सामने खेळणार आहेत, तर त्यापाठोपाठ इग्लंडं २१ कसोटी सामने आगामी दोन वर्षात खेळेल. या पर्वात ऑस्ट्रेलिया आणि इंग्लंड संघात होणारी प्रतिष्ठेची ऍशेस मालिकाही पाहायला मिळणार आहे. ही मालिका २०२५ च्या अखेरीस ऑस्ट्रेलियात होईल.

या चौथ्या पर्वात एकूण १८ कसोटी सामने खेळणार आहे. यात मायदेशात वेस्ट इंडिज, दक्षिण आफ्रिका आणि ऑस्ट्रेलिया संघांविरुद्ध कसोटी मालिका होईल, तर इंग्लंड, श्रीलंका आणि न्यूझीलंड हे परदेशी दौरे भारताला या पर्वात करायचे आहेत.

तिसऱ्या पर्वाचे विजेते दक्षिण आफ्रिका आपल्या चौथ्या पर्वातील मोहिमेला ऑक्टोबर २०२५ मध्ये पाकिस्तानविरुद्धच्या कसोटी मालिकेने सुरुवात करेल. त्यांना मायदेशात २०२६ मध्ये ऑस्ट्रेलियाविरुद्धही कसोटी मालिका खेळायची आहे.

भारतीय क्रिकेट संघ वर्ल्ड टेस्ट चॅम्पियनशीपच्या चौथ्या पर्वात इंग्लंडव्यतिरिक्त श्रीलंका आणि न्यूझीलंडचे दौरे करणार असून या दोन्ही दौऱ्यात प्रत्येकी २ कसोटी सामन्यांची मालिका खेळणार आहे. तसेच भारताला मायदेशात वेस्ट इंडिज आणि दक्षिण आफ्रिका संघांविरुद्ध प्रत्येकी २ सामन्यांची मालिका खेळायची आहे.

त्याबरोबरच भारत ऑस्ट्रेलियाविरुद्ध मायदेशात ५ सामन्यांची कसोटी मालिकाही खेळणार आहे. म्हणजेच येत्या दोन वर्षात भारताला ऑस्ट्रेलिया, इंग्लंड, न्यूझीलंडसह विजेत्या दक्षिण आफ्रिका या संघांचे तगडे आव्हान पेलावे लागणार आहे.

• २० ते २४ जून - पहिला कसोटी सामना, हेडिंग्ले, ली़ड्स

• २ ते ६ जुलै - दुसरा कसोटी सामना, एजबस्टन, बर्मिंगहॅम

• १० ते १४ जुलै - तिसरा कसोटी सामना, लॉर्ड्स, लंडन

• २३ ते २७ जुलै - चौथा कसोटी सामना, ओल्ड ट्रॅफर्ड, मँचेस्टर

• ३१ जूलै ते ४ ऑगस्ट - पाचवा कसोटी सामना, ओव्हल, लंडन