महिलांच्या लीगमध्ये गोलंदाजीत सर्वात लक्षवेधी ठरली, ती ‘परभणी एक्स्प्रेस’ म्हणून नावारूपास आलेली पुणे वॉरियर्सची चिन्मयी बोरपले. ‘पर्पल कॅप’धारक चिन्मयी अंतिम सामन्यात भलेही ती आपला प्रभाव दाखवू शकली नाही; परंतु संपूर्ण स्पर्धेत ५.१९च्या इकॉनॉमीने एकूण १३ बळी तिने मिळवले.

तीन किंवा त्याहून अधिक बळी मिळवण्याची किमया तिने तीनदा साधली. रत्नागिरी जेट्सच्या प्रियांका घोडकेने रायगड रॉयल्सविरुद्ध पाच बळी घेतले. हे पंचक साधणारी ती पहिलीच. तिच्या खात्यावर एकूण १० बळी जमा होते. सोलापूर स्मॅशर्सच्या आरती केदारने एकंदर नऊ बळी प्राप्त केले.

फलंदाजांमध्ये सोलापूर स्मॅशर्सच्या सलामीवीर ईश्वरी द्वयीने मजबूत भागीदाऱ्या करीत संघाच्या विजयासाठी पाया रचण्याचे कार्य इमानेइतबारे केले. २१ वर्षीय ईश्वरी सावकारने अंतिम सामन्यात २२ धावांचे योगदान दिले. याशिवाय सर्वाधिक २६९ धावा करताना ‘ऑरेंज कॅप’ संपादन केली.

तिची जोडीदार १५ वर्षीय ईश्वरी अवसरेने ११५ धावा काढल्या. सोलापूर स्मॅशर्सची कर्णधार तेजल हसबनीस आगामी इंग्लंड दौऱ्यासाठी सज्ज झाली आहे. हेच तिने २५५ धावांच्या आपल्या कामगिरीतून सिद्ध केले. रत्नागिरी जेट्सची कर्णधार स्मृतीने पाच सामन्यांत ३०.४०च्या सरासरीने १५२ धावा केल्या.

पहिल्या सामन्यात डावाचा प्रारंभ करताना गौतमीसोबत ८५ धावांची दमदार सलामी नोंदवली. या वेळी स्मृतीचे ३५ धावांचे योगदान होते. याशिवाय दोन अर्धशतकेही तिने झळकावली. पुणे वॉरियर्सची ३४ वर्षीय श्वेता माने ही लीगमधील सर्वात वयस्क क्रिकेटपटू; परंतु १५२ धावांसह तिचे संघाच्या जेतेपदामधील योगदान अधोरेखित होते. पुण्याकडून सुहानी काहंदलची कामगिरीही (१४५ धावा) लक्षवेधी ठरली.

अष्टपैलूंमध्ये सर्वाधिक यशस्वी ठरली, ती अनुजा पाटील. रिक्षाचालकाच्या या कन्येने भारताचे प्रतिनिधित्व करण्याचे स्वप्न केव्हाच साध्य केले आहे; पण राज्यातली लीग खेळताना तिच्यातील विजिगिशू वृत्तीचे उत्तम दर्शन घडले. गोलंदाजीत नऊ बळी आणि फलंदाजीत १४५ धावा हा तिचा पुण्याच्या यशातला सिंहाचा वाटा. तिच्याच संघाच्या खुशी मुल्लानेही १६६ धावा आणि चार बळी मिळवले.

सोलापूर स्मॅशर्समधील बीडच्या मुक्ता मगरेने नऊ बळी आणि १४२ धावा केल्या. अंतिम सामन्यात ४१ चेंडूंत ४० धावाही तिने केल्या; परंतु संघाला जेतेपद मिळवून देण्यात ती अपयशी ठरली. रायगड रॉयल्सची कर्णधार किरण नवगिरे ही पूर्वाश्रमीची अॅथलेटिक्सपटू. पुणे विद्यापीठाकडून तिने अनेक पदके जिंकली होती.

शेतकऱ्याची ही कन्या नंतर क्रिकेटकडे वळली आणि देशाकडून खेळली. ‘घूमर’ या चित्रपटात प्रशिक्षकाच्या भूमिकेत दिसलेल्या किरणने या स्पर्धेत तीन बळी आणि ११३ धावा केल्या. रत्नागिरी जेट्सच्या गौतमी नाईकने चमकदार कामगिरीचे प्रदर्शन केले. सामना जिंकून देण्याची क्षमता असलेल्या या २७ वर्षांच्या गौतमीकडून (१७३ धावा) महाराष्ट्राला मोठ्या अपेक्षा ठेवता येतील.

एकंदरीत महाराष्ट्र प्रीमियर लीगच्या आयोजनाचा उद्देश सार्थकी ठरला आहे, असे म्हटल्यास वावगे ठरणार नाही. कारण राज्यातील महिला क्रिकेटपटूंची गुणवत्ता यानिमित्ताने जोपासली गेली. खेळाडू, प्रशिक्षक, चाहते आणि पुरस्कर्ते या प्रत्येक बाबतीत लीगचे यश ठळकपणे दिसून येते.

येत्या काही दिवसांत देशांतर्गत क्रिकेट हंगामाला प्रारंभ होईल. या स्पर्धांमध्ये महाराष्ट्राचे हेच तारे चमकतील आणि पुढे देशाचे प्रतिनिधित्व करतील किंवा महिलांच्या प्रीमियर लीगमध्ये आपली कर्तबगारी दाखवतील.