इराण विरुद्ध इस्रायल यु्द्धामुळे जगातील सर्वच देशांची चिंता वाढली आहे. अमेरिका, रशिया या बड्या देशांनीही आपली भूमिका जाहीर केली आहे. त्यानंतर आता अफगाणिस्तानातील तालिबाननेही या युद्धाबाबत मोठं विधान केलं आहे.तालिबानने इस्रायलला जोरदार विरोध केला आहे. तसेच इस्लामिक देशांना मोलाचा संदेश दिला आहे.

तालिबानकडून युद्ध थांबवण्याचे आवाहन

इस्रायल-इराण युद्धादरम्यान, अफगाणिस्तानचे परराष्ट्रमंत्री आमिर खान मुत्तकी यांनी म्हटले की, “मी ओआयसीच्या सदस्य देशांना इस्रायलकडून पॅलेस्टाईन आणि इराणवर होत असलेला अत्याचार थांबवण्याचे आवाहन करतो. जर ही परिस्थिती अशीच राहिली तर इतर देशांच्या सुरक्षेला थेट धोका निर्माण होईल याचे विनाशकारी परिणाम होऊ शकतात.”

मुत्तकी यांचा मुस्लिम देशांना संदेश

आमिर खान मुत्तकी यांनी म्हटले की, ” ओआयसीची ही शिखर परिषद केवळ संकटाची चिंता करण्यासाठी नसावी, तर ती व्यावहारिक कामे, सर्व देशांची एकत्रित भूमिका आणि नवीन उपाय शोधण्यासाठी असावी. जर इस्लामिक देशांनी मजबूत राजकीय इच्छाशक्ती, इस्लामिक बंधुता आणि परस्पर सहकार्याने काम केले तर याचा जागतिक निर्णय घेणाऱ्या देशांवरही प्रभाव पडेल.’

पाश्चात्य देशांकडून तालिबानला मान्यता नाही

महत्वाची बाब म्हणजे, अफगाणिस्तानातील तालिबान सरकारला संयुक्त राष्ट्र आणि अमेरिकेसह अनेक पाश्चात्य देशांनी स्वीकारलेले नाही. त्यामुळे तालिबानला जागतिक व्यासपीठावर संधी मिळत नाही. त्याच बरोबर या देशाला आंतरराष्ट्रीय बँकेकडून कर्जही मिळत नाही. पाश्चात्य देशांनी तालिबानवर महिलांच्या हक्कांचे उल्लंघन केल्याचा आरोप केला आहे. त्यामुळे या सरकारला मान्यता मिळालेली नाही. मात्र तालिबानचे नेते मुस्लिम देशांच्या व्यासपीठावर आपले मनोगत व्यक्त करु शकतात.

अमेरिकेचा इराणवर हल्ला

अमेरिकेने इराणच्या नातानझ, इस्फहान आणि फोर्डो अणु तळांवर बी-2 बॉम्बरने हल्ला केला होता. हा हल्ला इराणच्या आण्विक स्थळावर करण्यात आला होता अशी माहिती अमेरिकेचे अध्यक्ष डोनाल्ड ट्रम्प यांनी दिली होती. आमचा हेतू इराणने अणुबॉम्ब बनवू नये असा आहे असंही अमेरिकेने म्हटलं होतं. मात्र त्यानंतर इराणने अमेरिकेच्या सिरियातील तळावर हल्ला केला होता अशी माहिती समोर आली आहे.