गेल्या काही दिवसांपासून सुरु असलेलं इराण-इस्रायलमधील युद्ध थांबलं आहे. या युद्धबंदीनंतर अमेरिकेचे राष्ट्राध्यक्ष डोनाल्ड ट्रम्प नेदरलँड्सच्या दौऱ्यावर आहेत. या दौऱ्यात ट्रम्प नाटो देशांच्या नेत्यांची भेट घेत आहेत. यात युद्धबंदीनंतर कोणत्या देशाला आघाडी मिळाली याबाबतही चर्चा होत आहे. अशातच आता डोनाल्ड ट्रम्प यांनी या युद्धाबाबत महत्वाची माहिती दिली आहे.

नाटो देशांच्या बैठकीनंतर डोनाल्ड ट्रम्प यांनी पत्रकारांशी संवाद साधला. यावेळी ट्रम्प म्हणाले की, “इराणकडे खनिज तेल आहे, ते समजदार लोक आहेत. या युद्धात इस्रायलचे खूप नुकसान झाले आहे. गेल्या दोन दिवसांत बॅलिस्टिक क्षेपणास्त्रांनी अनेक इमारती उद्ध्वस्त केल्या आहेत.” ट्रम्प यांच्या या विधानामुळे इराण या युद्धात वरचढ ठरल्याचे संकेत मिळाले आहे. तसेच इराणने असा दावा केला होता की, इस्रायलने युद्धबंदीसाठी पुढाकार घेतला होता या दाव्यालाही बळकटी मिळाली आहे.

इस्रायलचे मोठे नुकसान

12 दिवस चाललेल्या इराण आणि इस्रायलमधील यु्द्धात इस्रायलचे मोठे नुकसान झाले आहे. इस्रायली मीडियानेही हे स्वीकारले आहे. एका रिपोर्टनुसारइस्रायलमधील सुमारे 39 हजार लोकांनी नुकसान भरपाईसाठी अर्ज केले आहेत. यातील बहुतांशी लोकांची घरे उद्ध्वस्त झाली आहेत. तसेच अनेकांच्या वाहनांचे नुकसान झाले आहे.

समोर आलेल्या आकडेवारीनुसार इस्रायलमधील 30,809 नागरिकांनी घराचे नुकसान झाल्याने भरपाई देण्यात यावी असा अर्ज केला आहे, तसेच 3719 लोकांनी वाहनांच्या नुकसानीसाठी भरपाई मिळावी म्हणून अर्ज केला आहे. तसेच यंत्रसामग्री आणि इतर वस्तूंच्या नुकसान भरपाईसाठी 4085 लोकांनी अर्ज केला आहे.

इराणचे किती नुकसान?

इस्रायलने केलेल्या हल्ल्यामुळे इराणमध्येही मोठे नुकसान झाले आहे. मात्र इमारतींच्या किंवा घरांच्या नुकसानीची माहिती मिळाली नाही. इस्रायलच्या हल्ल्यामुळे इराणमध्ये सुमारे 600 लोकांचा मृत्यू झाला आहे, यात अनेक लष्करी अधिकाऱ्यांचाही समावेश आहे. तसेच इस्रायलमध्ये 30 लोकांचा मृत्यू झाल्याची माहिती समोर आली आहे.