विराट कोहली भारतीय क्रिकेटमधील दिग्गज खेळाडूंमधील एक खेळाडू आहे. आत्तापर्यंत त्याने आंतरराष्ट्रीय क्रिकेटमध्ये अनेक विक्रमही केले आहेत. तब्बल ८२ शतके त्याच्या नावावर आहेत. पण आता विराट त्याच्या कारकिर्दीच्या शेवटच्या टप्प्यात आहे.

त्याने कसोटी आणि आंतरराष्ट्रीय टी२० मधून निवृत्ती घेतली आहे. पण तो वनडेत अद्याप खेळत आहे. दरम्यान, तो त्याच्या अखेरच्या टप्प्यात असला, तरी आता आणखी एक कोहली क्रिकेटमध्ये कारकिर्द घडवण्यासाठी तयार होत आहे.

विराट कोहलीचा १५ वर्षीय पुतण्या आर्यवीर कोहलीही काकाच्या पावलावर पाऊल टाकत क्रिकेटमध्ये नशीब आजमवणार आहे. आर्यवीर हा विराटचा मोठा भाऊ विकास याचा मुलगा आहे. आर्यवीरने आगामी दिल्ली प्रीमियर लीगच्या लिलावात नोव नोंदवलं असून त्याचं नाव शॉर्टलिस्टही करण्यात आलं आहे. आता या लीगचा लिलाव ५ जुलैला होणार आहे.

लक्षात घेण्यासारखी गोष्ट अशी की आर्यवीर फिरकीपटू (Leg Spinner) आहे. तो विराट कोहलीचे लहानपणीचे प्रशिक्षक राज कुमार शर्मा यांच्याकडेच वेस्ट दिल्ली क्रिकेट ऍकेडमीमध्ये प्रशिक्षण घेत आहे. त्याला सी कॅटेगरीमध्ये ठेवण्यात आले असून तो दिल्ली क्रिकेटमधील गेल्यावर्षीचा १६ वर्षांखालील नोंदणीकृत खेळाडू होता.

नोंदणीकृत खेळाडू म्हणजे त्यांची संभाव्य ३० जणांच्या संघात निवड झालेली असते. त्यामुळे आता दिल्ली क्रिकेटमध्ये आणखी एक कोहली क्रिकेट गाजवणार का, हे पाहावे लागणार आहे.

दरम्यान, केवळ विराटचा पुतण्याच नाही, तर भारताचा माजी सलामीवीर विरेंद्र सेहवागचा मुलगा, ज्याचं नावही आर्यवीरच आहे, तो देखील दिल्ली प्रीमियर लीगच्या लिलावात दिसणार आहे. १७ वर्षांचा असलेल्या आर्यवीर सेहवागनेही या लिलावासाठी नोंदणी केली असून त्याचंही नाव शॉर्टलिस्ट झाले आहे.

आर्यवीर सेहवागने १९ वर्षांखालील दिल्ली संघाचे प्रतिनिधित्व केले आहे. त्याने मेघालयाविरुद्ध २९७ धावांची खेळीही केली होती. त्याला लिलावासाठी बी कॅटेगरीमध्ये ठेवण्यात आलंय.

इतकंच नाही, तर सेहवागचा धाकटा मुलगा वेदांत देखील या लीगच्या लिलावात आहे. तो देखील बी कॅटेगरीमध्ये आहे. १५ वर्षीय वेदांत ऑफ स्पिनर असून १६ वर्षांखालील संघाकडून खेळला आहे.