भारतात कॉफी हा केवळ एक पेय नसून अनेकांसाठी तो सकाळचा ऊर्जा स्रोत आहे. अनेक घरांमध्ये चहाबरोबरच कॉफीचा देखील समावेश असतो. मात्र सध्या सोशल मीडियावर एक धक्कादायक माहिती व्हायरल झाली आहे कॉफीमध्ये झुरळे किंवा इतर सूक्ष्म कीटक कुस्करलेले असू शकतात. ही बाब केवळ अफवा नसून अमेरिकेच्या अन्न आणि औषध प्रशासन (FDA) नेही ही शक्यता मान्य केली आहे. त्यामुळे कॉफीप्रेमींमध्ये चिंतेचं वातावरण आहे.

ही माहिती प्रथम समोर आली 1980 च्या दशकात, जेव्हा एका बायोलॉजी प्राध्यापकांना इन्स्टंट कॉफी पिल्यावर अ‍ॅलर्जी होत असल्याचं लक्षात आलं. त्यांच्या सहकाऱ्यांनी याचा सखोल अभ्यास केला आणि असं आढळलं की ही अ‍ॅलर्जी झुरळांमुळे होत होती. त्यावरून संशय वाढला की ग्राउंडेड कॉफीमध्ये झुरळे किंवा त्यांचे अवशेष मिसळले गेलेले असावेत. हे प्रकरण केवळ वैयक्तिक अनुभवापुरतं मर्यादित न राहता नंतर वैज्ञानिक तपासणीतूनही पुष्टी झालं.

एफडीए काय सांगतं?

यूएस FDA ने स्पष्टपणे म्हटलं आहे की अन्नपदार्थांच्या मोठ्या प्रमाणात उत्पादन व प्रक्रिया करताना सर्वच सूक्ष्म कीटक पूर्णपणे काढून टाकणे शक्य नसते. त्यातही कॉफी बीन साठवण्याच्या ठिकाणी झुरळं, मुंग्या, उंदीर अशा कीटकांचा वावर होतो. विशेषतः प्री-ग्राउंड कॉफी म्हणजे जी आधीच दळलेली असते, त्यामध्ये अशा घटकांचा समावेश होण्याचा धोका अधिक असतो. एफडीएच्या मते, 10% पर्यंत अशा कीटकांचे अंश आढळू शकतात हे मान्य आहे.

शुद्ध आणि सुरक्षित कॉफी कशी निवडावी?

कॉफीप्रेमींनी आता काळजी घ्यायला हवी. बाजारात मिळणारी रेडी-टू-यूज कॉफी घेण्याऐवजी ताजी बीन निवडून स्वतः दळणं अधिक सुरक्षित पर्याय ठरतो. हल्ली अनेक ब्रँड्स शुद्ध आणि ऑर्गॅनिक कॉफी उपलब्ध करून देत आहेत, ज्यांना कीटकनियंत्रणाची योग्य प्रक्रिया दिली जाते. फक्त चव नव्हे, तर स्वच्छता आणि शुद्धतेकडेही लक्ष देणं आवश्यक आहे.