थोडक्यात:

• इंग्लंडविरुद्ध चौथ्या कसोटीत रवींद्र जडेजाने भारताच्या दुसऱ्या डावात अर्धशतक ठोकले.

• यासोबतच जडेजाने मोठे विक्रम करताना व्हीव्हीएस लक्ष्मण आणि गॅरी सोबर्स यांची बरोबरी केली आहे.

• जडेजाने वॉशिंग्टन सुंदरसोबत शतकी भागीदारीही केली.

भारत आणि इंग्लंड संघात सध्या कसोटी मालिकेतील चौथा सामना मँचेस्टरच्या ओल्ड ट्रॅफर्ड मैदानात सुरू आहे. हा सामना रोमांचक स्थितीत आहे. हा सामना देखील शेवटच्या दिवसाच्या शेवटच्या सत्रापर्यंत रंगला आहे.

भारतासमोर हा सामना वाचवण्याचे आव्हान पाचव्या दिवशी होते. अशावेळी भारताकडून शुभमन गिल, रवींद्र जडेजा आणि वॉशिंग्टन सुंदर यांनी दमदार फलंदाजी केली आहे. यादरम्यान रवींद्र जडेजाने इतिहास रचला आहे.

या सामन्यात पहिल्या डावात भारताने ३५८ धावा केल्या होत्या. त्यानंतर इंग्लंडने पहिल्या डावात ६६९ धावा करत भारताविरुद्ध ३११ धावांची आघाडी घेतली होती. त्यानंतर भारतीय संघ दुसऱ्या डावात चौथ्या दिवशी फलंदाजीला उतरला. यावेळी भारताने पहिल्याच षटकात यशस्वी जैस्वाल आणि साई सुदर्शन यांच्या विकेट्स गमावल्या.

पण त्यानंतर शुभमन गिल आणि केएल राहुल यांनी दीडशतकी भागीदारी करत संपूर्ण दिवस खेळून काढला. पाचव्या दिवशीही ते संयमी खेळ करत होते. मात्र बेन स्टोक्सने केएल राहुलल ९० धावांवर बाद केले. मात्र त्यानंतर शुभमन गिलला वॉशिंग्टन सुंदरची साथ मिळाली. यादरम्यान, शुभमन गिलने त्याचे कसोटी कारकिर्दीतील ९ वे शतक पूर्ण केले.

पण शतकानंतर त्याला जोफ्रा आर्चरने १०३ धावांवर बाद करत भारताला चौथा धक्का दिला. यानंतर सुंदरला साथ देण्यासाठी रवींद्र जडेजा उतरला होता. जडेजाला पहिल्याच चेंडूवर जीवदान मिळाले. त्याचा झेल जो रुटकडून सुटला. पण त्यानंतर जडेजाने त्याचा फायदा उचलला. त्याने वॉशिंग्टन सुंदरसोबत शतकी भागीदारी करत आधी भारताची ३११ धावांची पिछाडी भरून काढण्यात मोलाचा वाटा उचलला. यादरम्यान सुंदर आणि जडेजा या दोघांनीही अर्धशतके पूर्ण केली.

जडेजाने सध्या सुरू असलेल्या कसोटी मालिकेत ४०० धावाही पार केल्या आहेत. तसेच इंग्लंडमध्ये कसोटीत १००० धावा पूर्ण केल्या आहेत. त्यामुळे जडेजा इंग्लंडमध्ये कसोटीत १००० धावा करणारा सातवा भारतीय खेळाडू आहे.

यापूर्वी सचिन तेंडुलकर (१५७५), राहुल द्रविड (१३७६), सुनील गावसकर (११५२), केएल राहुल (११२५*), विराट कोहली (१०९६), रिषभ पंत (१०३५*) यांनी असा कारनामा केला आहे.