दरम्यान, लॉर्ड्सवर झालेल्या कसोटी सामन्याबद्दल सांगायचे झाले, तर इंग्लंडने प्रथम फलंदाजी करताना ११२.३ षटकात सर्वबाद ३८७ धावा केल्या होत्या. इंग्लंडकडून जो रुटने १०४ धावांची खेळी केली होती, तर जेमी स्मिथने ५१ आणि ब्रायडन कार्सने ५६ धावांची खेळी केली होती. भारताकडून जसप्रीत बुमराहने ५ विकेट्स घेतल्या.

त्यानंतर भारतानेही ११९.२ षटकात सर्वबाद ३८७ धावाच केल्या. भारताकडून केएल राहुलने १०० धावांची खेळी केली, तर रिषभ पंत (७४) आणि रवींद्र जडेजा (७२) यांनी अर्धशतके साकारली. इंग्लंडकडून ख्रिस वोक्सने ३ विकेट्स घेतल्या.

दुसऱ्या डावात इंग्लंडने ६२.१ षटकात सर्वबाद १९२ धावा केल्या होत्या. इंग्लंडकडून जो रुटने ४० धावा केल्या होत्या. भारताकडून वॉशिंग्टन सुंदरने ४ विकेट्स घेतल्या. त्यानंतर १९३ धावांच्या लक्ष्याचा पाठलाग करताना भारताने ११२ धावांवर ८ विकेट्स गमावल्या होत्या.

पण नंतर जसप्रीत बुमरा आणि मोहम्मद सिराज यांनी रवींद्र जडेजासोबत फलंदाजी करताना चिवट झुंज दिली. मात्र बुमराह ५४ चेंडूत ५ धावा करून बाद झाला, तर सिराज ३० चेंडूत ४ धावा करून बाद झाला. रवींद्र जडेजा ६१ धावांवर नाबाद राहिला होता. भारताचा संघ ७४.५ षटकात १७० धावांवर सर्वबाद झाला होता.