உலக வல்லரசுகளுக்கு இடையேயான அதிகார சமநிலை மாறிவரும் சூழலில், ஆப்பிரிக்கா முதல் இந்திய பெருங்கடல் வழியாக மத்திய கிழக்கு மற்றும் கிழக்கு ஆசியாவை இணைக்கும் ஒரு புதிய வர்த்தக பாதை உருவாகி வருகிறது. இந்த திட்டத்தின் மையப்புள்ளியாக ஜப்பான் விளங்குகிறது. இது உலக அரங்கில் ஏற்பட்டு வரும் மாற்றங்களை உணர்த்துகிறது.

பல்வேறு நாடுகள் ஆப்பிரிக்காவுடன் ராணுவ மற்றும் பொருளாதார உறவுகளை வலுப்படுத்தி வருகின்றன. மேற்குலகின் புதிய காலனித்துவ கொள்கைகளில் இருந்து விலகி, பல ஆப்பிரிக்க நாடுகள் ரஷியா, சீனா, ஐக்கிய அரபு அமீரகம் மற்றும் துருக்கி போன்ற நாடுகளுடன் வலுவான உறவுகளை ஏற்படுத்தி கொண்டுள்ளன. இந்த சூழலில், ஆப்பிரிக்கா உலக அதிகார மாற்றங்களின் மையமாக மாறியுள்ளது.

சமீபத்தில் டோக்கியோ சர்வதேச ஆப்பிரிக்க மேம்பாட்டு மாநாட்டுடன் இணைந்து நடைபெற்ற பொருளாதார மாநாட்டில், ஜப்பான் பிரதமர் ஷிங்கரு இஷிபா ஒரு புதிய மற்றும் துணிச்சலான திட்டத்தை வெளியிட்டார். இதன் நோக்கம், ஆப்பிரிக்கா மற்றும் ஆசிய நாடுகளுக்கு இடையேயான உறவுகளை வலுப்படுத்துவதாகும். இதில் இந்தியா மற்றும் மத்திய கிழக்கு நாடுகளும் அடங்கும். இந்த உறவுகள் வர்த்தகம், உள்கட்டமைப்பு மேம்பாடு மற்றும் பரஸ்பர ஒத்துழைப்பு ஆகியவற்றின் மூலம் வலுப்படுத்தப்படும். இந்த திட்டத்திற்கு “இந்தோ-ஆப்பிரிக்கா பொருளாதார மண்டலம்” என்று பெயரிடப்பட்டுள்ளது.

ஜப்பானின் தொலைநோக்கு மற்றும் ஆப்பிரிக்காவின் முக்கியத்துவம்
இந்த திட்டம் ஜப்பானின் நீண்டகால எரிசக்தி, வர்த்தகம் மற்றும் பாதுகாப்பு தேவைகளை பூர்த்தி செய்யும் வகையில் அமைந்துள்ளது. மேலும், பல ஆண்டுகளாக பொருளாதார உதவிகளை மட்டும் பெறும் ஒரு பகுதியாக இல்லாமல், ஆப்பிரிக்காவை மேம்பாட்டுக்கான ஒரு சமமான கூட்டாளியாக ஜப்பான் இந்தத் திட்டத்தில் பார்க்கிறது.

இத்திட்டத்திற்குப் பின்னால் உள்ள ஜப்பானின் முக்கிய காரணம், ஆப்பிரிக்காவின் வளமான எதிர்காலமே. தற்போது 1.4 பில்லியனுக்கும் அதிகமான மக்கள் வசிக்கும் ஆப்பிரிக்காவின் மக்கள்தொகை 2050-க்குள் இருமடங்காக உயரும் என எதிர்பார்க்கப்படுகிறது. அத்துடன், பசுமை எரிசக்திக்கு அவசியமான அரிய வகை தாதுக்கள், தாமிரம் மற்றும் கோபால்ட் போன்ற கனிமங்களும் ஆப்பிரிக்காவில் ஏராளமாக உள்ளன.

இத்திட்டத்தின் மற்றொரு முக்கிய அம்சம், ஜப்பான், ஆப்பிரிக்கா, இந்தியா மற்றும் மத்திய கிழக்கு நாடுகளுக்கு இடையே ஒரு வர்த்தக மற்றும் தளவாட முக்கோணத்தை உருவாக்குவது. இதன்மூலம், ஆப்பிரிக்க உற்பத்தியாளர்களை துறைமுகங்கள் போன்ற தளவாட மையங்களுடன் இணைத்து, உலகளாவிய விநியோக சங்கிலிகளை வலுப்படுத்த ஜப்பான் நோக்கமாக கொண்டுள்ளது. கென்யாவில் உள்ள மொம்பாசா துறைமுகம் மற்றும் ஜாம்பியாவில் உள்ள நாலா துறைமுகம் ஆகியவை ஜப்பானின் உதவியுடன் நவீனப்படுத்தப்பட்டு வருகின்றன.

ஆப்பிரிக்காவில் சீனா தனது “பெல்ட் அண்ட் ரோட்” முன்முயற்சி மூலம் ஏற்கனவே பெரிய அளவில் முதலீடு செய்து, துறைமுகங்கள், ரயில்வே மற்றும் உள்கட்டமைப்பை அமைத்துள்ளது. அமெரிக்காவும் “ப்ராஸ்பர் ஆப்ரிக்கா” போன்ற திட்டங்களை வைத்திருந்தாலும், அவை பெரிய தாக்கத்தை ஏற்படுத்தவில்லை. இந்த சூழலில், ஜப்பான் தனது தனித்துவமான அணுகுமுறையுடன் களமிறங்கியுள்ளது.

ஜப்பானின் இந்த புதிய வர்த்தக மண்டல முன்முயற்சி, ஒரு புதிய வர்த்தக பாதையை விட மேலானது. இது உள்கட்டமைப்பை உருவாக்குதல், ஆப்பிரிக்காவில் இணைப்பை மேம்படுத்துதல் மற்றும் உள்ளூர் நலன்களுக்கு முக்கியத்துவம் அளித்தல் போன்ற அமைதியான முன்முயற்சிகளை ஆதரிப்பதன் மூலம் உலக பொருளாதார வரைபடத்தை மறுவடிவமைக்க முயல்கிறது. புதிய சந்தைகளை தேடுவதற்கு அப்பால், வளர்ந்து வரும் உலகளாவிய வளர்ச்சி மையமாக ஆப்பிரிக்காவை மாற்றுவதில் ஜப்பான் பங்களிக்கிறது என்று கூறலாம்.

Author: Bala Siva