இந்தியாவுக்கும் அமெரிக்காவுக்கும் இடையேயான வர்த்தக பேச்சுவார்த்தையின் ஆறாம் கட்ட சுற்று, இரு நாடுகளுக்கும் இடையே ஒருமித்த கருத்து ஏற்படாத நிலையில் நடைபெற்று வருகிறது. ஏற்கனவே ஐந்து கட்டங்களாக நடைபெற்ற பேச்சுவார்த்தைகள் தோல்வியில் முடிந்துள்ளதால், தற்போதைய சந்திப்பும் சவாலாக உள்ளது. குறிப்பாக, அமெரிக்காவின் வேளாண் பொருட்களின் இறக்குமதி தொடர்பாக இந்தியாவுக்கு அமெரிக்கா தொடர்ந்து அழுத்தம் கொடுத்து வருகிறது.
அமெரிக்கா, இந்தியாவை நோக்கி ஒரு புது கோரிக்கையை வைத்துள்ளது. அதாவது, பிற வேளாண் பொருட்களை இறக்குமதி செய்யாவிட்டாலும், அமெரிக்காவிலிருந்து சீஸ் (Cheese) இறக்குமதி செய்ய வேண்டும் என்பது அதன் கோரிக்கையாகும். இந்தியா, ஏற்கெனவே டென்மார்க் மற்றும் நெதர்லாந்து போன்ற நாடுகளில் இருந்து சீஸ் இறக்குமதி செய்து வருகிறது. இந்த நிலையில், அமெரிக்காவிலிருந்தும் சீஸ் இறக்குமதிக்கு இந்தியா ஒப்புக்கொள்ளும் என அமெரிக்கா நம்புகிறது.
அமெரிக்கா தனது சீஸ்-ஐ இந்தியாவுக்கு ஏற்றுமதி செய்வதன் மூலம், இந்தியாவின் உள்நாட்டு உற்பத்தியில் பெரிய பாதிப்பு ஏற்படாது என்றும், குறிப்பாக சிறு விவசாயிகளை பாதிக்காது என்றும் வாதிடுகிறது. ஆனால், இந்தியாவின் உள்நாட்டு பால் உற்பத்தியாளர்கள் மற்றும் விவசாயிகள் இது குறித்து கவலையடைந்துள்ளனர்.
சீஸ் மட்டுமின்றி, சோளம் இறக்குமதி செய்யவும் அமெரிக்கா இந்தியாவுக்கு அழுத்தம் கொடுத்து வருகிறது. இதற்கு பின்னால் ஒரு முக்கியமான காரணம் உள்ளது. அமெரிக்கா சோள உற்பத்தியில் முன்னணியில் இருக்கும் நிலையில், அதன் மிகப்பெரிய இறக்குமதி நாடான சீனா, இப்போது அமெரிக்காவிலிருந்து சோளம் வாங்குவதை கிட்டத்தட்ட நிறுத்திவிட்டது.
இதனால், அமெரிக்காவில் பல டன் கணக்கில் சோளம் தேங்கியுள்ளது. இந்த சூழ்நிலையில், அமெரிக்கா தனது சோளத்தை இந்தியா போன்ற மற்ற நாடுகளுக்கு ஏற்றுமதி செய்ய முயற்சிக்கிறது. ஆனால், இந்தியா ஏற்கெனவே மியான்மர் மற்றும் உக்ரைன் போன்ற நாடுகளில் இருந்து சோளம் இறக்குமதி செய்து வருகிறது.
அமெரிக்காவிடமிருந்து சோளம் இறக்குமதி செய்ய இந்தியா தயங்குவதற்கு மற்றொரு முக்கியக் காரணம், அமெரிக்காவில் உள்ள பெரும்பாலான சோளம் மரபணு மாற்றம் செய்யப்பட்டவை. இந்திய அரசு, மரபணு மாற்றம் செய்யப்பட்ட உணவு பொருட்களுக்கு அனுமதி அளிக்கவில்லை. இது குறித்த தனது உறுதியான நிலைப்பாட்டையும் அமெரிக்காவிடம் தெரிவித்துள்ளது.
இந்தியா, தனது விவசாய நலன்களை பாதுகாப்பதில் உறுதியாக உள்ளது. எனவே, அமெரிக்காவின் கோரிக்கைகளை அப்படியே ஏற்றுக்கொள்வதற்கு வாய்ப்பில்லை. இந்த பேச்சுவார்த்தைகள் ஒரு சுமுகமான முடிவை எட்டுமா, அல்லது இரு நாடுகளுக்கு இடையேயான வர்த்தக உறவில் மேலும் சிக்கல்களை உருவாக்குமா என்பதை பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
Author: Bala Siva
