दिल्ली, १८ ऑक्टोबर २०२५: प्रो कबड्डी लीगस्पर्धेत शनिवारी झालेल्या दुसऱ्या सामन्यात पुणेरी पलटन आणि तेलुगू टायटन्स हे दोन्ही संघ आमनेसामने आले होते. पुणेरी पलटनने आधीच टॉप २ आपलं स्थान निश्चित केलं आहे त्यामुळे त्यांनी अनुभवी खेळाडूंना विश्रांती देऊन युवा खेळाडूंना खेळण्याची संधी दिली. पण पुणेरी पलटनला हा सामना ४०-३१ गमवावा लागला आहे. पराभवानंतरही पुणेरी पलटनचा संघ टॉप २ मध्ये कायम राहणार आहे. तर विजयी तेलुगू टायटन्स संघाने टॉप ८ मध्ये आपलं स्थान निश्चित केलं आहे.

या सामन्यात पुणेरी पलटनकडून सचिन पहिली चढाई करण्यासाठी आला. पहिल्याच चढाईत एक गुण घेत त्याने संघाचं खातं उघडून दिलं. तर तेलुगू टायटन्सकडून विजय मलिकने देखील १ गुण घेत संघाचं खातं उघडलं.

पूर्वार्धातील सहाव्या मिनिटाला पुणेरी पलटनला पहिला मोठा धक्का बसला. पुणेरी पलटनचा संघ पहिल्यांदा ऑलआऊट झाला. यासह तेलुगू टायटन्सने १०-३ गुणांसह ७ गुणांची आघाडी घेतली. पूर्वार्धातील सुरुवातीच्या १० मिनिटात तेलुगू टायटन्स संघाचा बोलबाला पाहायला मिळाला. १० मिनिटांचा खेळ झाल्यानंतर तेलुगू टायटन्सचा संघ १४-४ गुणांसह १० गुणांनी आघाडीवर होता.