• भारतीय महिला संघाला ऑस्ट्रेलियाविरुद्ध उपांत्य सामन्यापूर्वी मोठा धक्का बसला आहे.

• फॉर्ममध्ये असलेल्या प्रतिका रावलला दुखापत झाल्याने ती स्पर्धेतून बाहेर झाली आहे.

• तिच्या जागी शफाली वर्माला संधी देण्यात आली आहे.

भारतीय महिला संघाला गुरुवारी (३० ऑक्टोबर) ऑस्ट्रेलियाविरुद्ध महिला वनडे वर्ल्ड कप २०२५ स्पर्धेत उपांत्य सामना खेळायचा आहे. मात्र या महत्त्वाच्या सामन्यापूर्वीच भारतीय संघाला मोठा धक्का बसला आहे.

भारताची फॉर्ममध्ये असलेल्या सलीमी फलंदाज प्रतिका रावल दुखापतग्रस्त झाली आहे. तिला साखळी फेरीतील शेवटच्या सामन्यात क्षेत्ररक्षणादरम्यान दुखापत झाली असून आता तिच्याबाबत बीसीसीआयने मोठी अपडेट देताना सांगितले आहे की ती या स्पर्धेतून बाहेर झाली आहे. तिच्याऐवजी बदली खेळाडूचीही निवड झाली आहे.

रविवारी (२६ ऑक्टोबर) नवी मुंबईत भारताचा बांगलादेशविरुद्ध साखळी फेरीतील अखेरचा सामना होता. या सामन्यात पावसाचा मोठ्या प्रमाणात पावसाचा व्यत्यय आला होता. त्यामुळे सामना रद्द करण्यात आला होता.

सामना रद्द होण्यापूर्वी बांगलादेशने २७ षटकात ९ बाद ११९ धावा केल्या होत्या आणि भारतासमोर डकवर्थ लुईस नियमानुसार २७ षटकात १२६ धावांचे लक्ष्य होते. या लक्ष्याचा भारतीय संघ पाठलाग करत असताना ८.४ षटकात बिनबाद ५७ धावा झालेल्या असताना पावसामुळे सामना थांबला आणि नंतर हा सामनाच रद्द करण्यात आला. पण या सामन्यात प्रतिकाला दुखापत झाली.

बांगलादेश फलंदाजी करत असताना शर्मिन अख्तरने मारलेल्या शॉटवर चेंडू आडवताना प्रतिकाचा पाय घसरला होता. त्यामुळे तिला गुडघ्याला आणि घोट्याला दुखापत झाली आहे.

बीसीसीआयने माहिती दिली आहे की या दुखापतीमुळे तिला या स्पर्धेतून बाहेर व्हावे लागले असून तिच्यावर बीसीसीआयची मेडिकल टीम लक्ष्य ठेवून आहे. ती लवकर बरी व्हावी यासाठी संघाने तिला शुभेच्छा दिल्या आहेत.

प्रतिकाने या संपूर्ण वर्ल्ड कपमध्ये शानदार फलंदाजी केली होती. तिने स्मृती मानधनासोबत चांगली भागीदारीही केली होती. तिने न्यूझीलंडविरुद्ध शतकही ठोकले होते. प्रतिकाने वर्ल्ड कप २०२५ मध्ये ६ डावात ५१.३३ च्या सरासरीने ३०८ धावा केल्या आहेत.