दिवसेंदिवस तरुणांमध्ये सोशल मीडियाचा वापर वाढत चालला आहे. या वापरामुळे तरुणांना अगदी कमी वयात अनेक आजारांना समोरे जावे लागत आहे. त्यामुळे आता एका देशात मोठा निर्णय घेण्यात आला आहे. या देशात 16 वर्षांखालील मुलांच्या सोशल मीडिया वापरावर बंदी घालण्यात आली आहे. यामध्ये कोणते सोशल मीडिया प्लॅटफॉर्म आहेत? हा देश कोणता आहे? असा प्रश्न अनेकांना पडला आहे. चला जाणून घेऊया..

ऑस्ट्रेलियाने अलीकडेच एक नवीन कायदा मंजूर केला आहे, ज्याअंतर्गत १६ वर्षांखालील मुलांसाठी सोशल मीडिया प्लॅटफॉर्मवर प्रतिबंध लावला जाईल. हा कायदा १० डिसेंबर २०२५ पासून लागू होईल. मेटा (फेसबुक आणि इंस्टाग्राम), टिकटॉक आणि स्नॅपचॅटने जाहीर केले आहे की ते या नवीन कायद्याचे पालन करतील. ऑस्ट्रेलियाच्या संसदेने ठरवले आहे की या प्लॅटफॉर्मवर १६ वर्षांखालील युजर्सना काढून टाकणे अनिवार्य असेल.

वाचा: अनाया बांगरचा मोठा निर्णय, शस्त्रक्रियेच्या 3 महिन्यांनंतर पुन्हा जुन्या गोष्टींकडे वळली

जर एखाद्या कंपनीने हा कायदा पाळला नाही, तर तिला ४९.५ दशलक्ष ऑस्ट्रेलियन डॉलर पर्यंत दंड भरावा लागू शकतो. मात्र, कंपन्यांनी चेतावनी दिली आहे की हा कायदा लागू करणे सोपे नाही. स्नॅपचॅट, टिकटॉक आणि मेटाने सांगितले की हा कायदा लागू करणे आव्हानात्मक असेल, तरीही ते नियमांचे पालन करतील. मेटाच्या धोरण निर्देशिका मिया गार्लिक यांनी सांगितले की लाखो युजर्सची ओळख पटवणे आणि काढून टाकणे अत्यंत आव्हानात्मक काम आहे.

टिकटॉकच्या ऑस्ट्रेलिया धोरण प्रमुख एला वुड्स-जॉयस यांनी म्हटले की कायद्याचे पालन करतील, पण हा कायदा तरुण युजर्सना इंटरनेटच्या अनोळखी आणि असुरक्षित भागांकडे ढकलू शकतो. स्नॅपचॅटच्या जेनिफर स्टाउट यांनीही म्हटले, ‘आम्ही सहमत नाही, पण कायद्याचे पालन करू.’

टेक इंडस्ट्रीची प्रतिक्रिया

ऑस्ट्रेलियाचा हा कायदा जगातील सर्वात कठोर सोशल मीडिया नियमांपैकी एक मानला जातो. अनेक टेक कंपन्यांनी याला ‘अस्पष्ट, समस्या निर्माण करणारा आणि घाईगडबडीत बनवलेला’ म्हटले आहे. यूट्यूबने यापूर्वीच चिंता व्यक्त केली होती की कायद्याचा हेतू चांगला असला तरी तो लागू करणे आणि मुलांची सुरक्षितता सुनिश्चित करणे कठीण आहे. याशिवाय, ऑस्ट्रेलियन ऑनलाइन निरीक्षण एजन्सीने सुचवले आहे की ही बंदी व्हॉट्सअॅप, ट्विच आणि रोब्लॉक्स सारख्या इतर प्लॅटफॉर्मपर्यंतही पसरू शकते.