இந்தியாவிற்கும் அமெரிக்காவிற்கும் இடையே விரைவில் ஒரு வர்த்தக ஒப்பந்தம் ஏற்படும் என்று அமெரிக்க அதிபர் டொனால்ட் டிரம்ப் சூசகமாக தெரிவித்துள்ளார். இந்தியப் பிரதமர் நரேந்திர மோடி மீது தனக்கு மிகுந்த மரியாதை இருப்பதாகவும் அவர் கூறினார். தென் கொரியாவின் கியோங்ஜுவில் நடந்த APEC தலைமை நிர்வாக அதிகாரிகள் உச்சி மாநாட்டில் டிரம்ப் இவ்வாறு கூறினார். பாகிஸ்தானுடனான மோதல் குறித்து பிரதமர் மோடியுடன் தான் நடத்திய உரையாடலை டிரம்ப் தனது உரையில் குறிப்பிட்டார். பிரதமர் மோடியை சிறந்த தோற்றமுடைய நபர் என்றும், தனக்கு ஒரு தந்தை என்றும் அவர் பராட்டித் தள்ளியுள்ளார்.



பிரதமர் மோடி மீது தனக்கு மிகுந்த மரியாதை மற்றும் பாசம் இருப்பதாகக் குறிப்பிட்ட டிரம்ப், அமெரிக்கா இப்போது இந்தியாவுடன் ஒரு வர்த்தக ஒப்பந்தத்தை முடிக்கத் திட்டமிட்டுள்ளதாகக் கூறினார். அமெரிக்காவிற்கும் இந்தியாவிற்கும் இடையிலான இருதரப்பு வர்த்தக ஒப்பந்தத்தின் முதல் கட்டத்திற்காக ஏற்கனவே ஐந்து சுற்று பேச்சுவார்த்தைகள் நடந்துள்ளன. அமெரிக்க தானியங்கள் மற்றும் பால் பொருட்களுக்கு இந்தியா தனது சந்தையைத் திறக்க வேண்டும் என்று அமெரிக்கா விரும்புகிறது. இருப்பினும், தனது சிறு விவசாயிகளின் வாழ்வாதாரத்தைப் பாதுகாக்க இந்தியா இந்தக் கோரிக்கையை எதிர்க்கிறது.



முன்னதாக, வர்த்தகம் மற்றும் தொழில்துறை அமைச்சர் பியூஷ் கோயல், இந்தியா அவசரமாகவோ அல்லது அழுத்தத்தின் கீழ் எந்த ஒப்பந்தத்திலும் ஈடுபடாது என்று கூறியிருந்தார். டிரம்ப் இந்தியாவில் இருந்து அமெரிக்காவிற்கு ஏற்றுமதி செய்யப்படும் பொருட்களுக்கு 50% வரி விதித்துள்ளார்.



இந்தியாவிற்கும் பாகிஸ்தானுக்கும் இடையிலான மோதல் நடந்து கொண்டிருந்தபோது, இரு நாடுகளுடனான வர்த்தக ஒப்பந்தங்களை நிறுத்துவதாக அமெரிக்கா அச்சுறுத்தியதாக டிரம்ப் மீண்டும் ஒருமுறை தலைமை நிர்வாக அதிகாரி உச்சி மாநாட்டில் கூறினார். இந்தியாவும் பாகிஸ்தானும் போரை நிறுத்தியிருக்காவிட்டால், அவர்கள் 250% வரிகளை எதிர்கொண்டிருக்கலாம். தெற்காசியாவில் மட்டுமல்ல, பிற உலகளாவிய மோதல்களிலும் அமைதியை அடைய அமெரிக்கா வர்த்தகம் மற்றும் வரிகளைப் பயன்படுத்தியுள்ளது என்று அமெரிக்க ஜனாதிபதி கூறினார்.