இந்திய டி20 அணியின் கேப்டனான சூர்யகுமார் யாதவ் (SKY), ஒருநாள் கிரிக்கெட் போட்டிகளில் தான் தொடர்ந்து சறுக்கி வருவது குறித்து, தென் ஆப்பிரிக்காவின் முன்னாள் ஜாம்பவான் ஏபி டிவில்லியர்ஸிடம் (AB de Villiers) இருந்து உதவி கோரி விடுத்த நெகிழ்ச்சியான வேண்டுகோள் கிரிக்கெட் வட்டாரத்தில் பெரும் பேசுபொருளாக மாறியுள்ளது.

தனது ‘360 டிகிரி’ பேட்டிங்கால் டிவில்லியர்ஸுக்கு மிகவும் நெருக்கமாக ஒப்பிடப்படும் சூர்யகுமார், டி20 கிரிக்கெட்டில் உலகின் நம்பர் 1 வீரராக , ஒருநாள் போட்டிகளில் தனது அதிரடியைக் கொண்டுவர முடியாமல் தவித்து வருகிறார்.

2021-ல் ஒருநாள் போட்டிகளில் அறிமுகமான சூர்யகுமார், 37 போட்டிகளில் வெறும் 25.76 சராசரியுடன் 773 ரன்கள் மட்டுமே எடுத்துள்ளார். சொந்த மண்ணில் நடந்த 2023 உலகக் கோப்பையில் அவர் சிறப்பாகச் செயல்படாததையடுத்து, ஒருநாள் அணியில் அவர் மீண்டும் சேர்க்கப்படவே இல்லை.

சூர்யகுமார் யாதவ் சமீபத்தில் பத்திரிகையாளருக்கு அளித்த பேட்டியில், தான் ஏபி டிவில்லியர்ஸைச் சந்தித்தால், டி20 மற்றும் ஒருநாள் கிரிக்கெட் வாழ்க்கையை எப்படிச் சமநிலைப்படுத்துவது (balance) என்றுதான் கேட்பேன் என்று கூறியுள்ளார். “என்னால் டி20 மற்றும் ஒருநாள் ஆட்டங்களைச் சமநிலைப்படுத்த முடியவில்லை.

ஒருநாள் ஆட்டங்களை நான் டி20 போலவே விளையாட நினைத்தேன். இரண்டு வடிவங்களிலும் அவர் எப்படி வெற்றி பெற்றார் என்று நான் தெரிந்து கொள்ள விரும்புகிறேன்” என்று தெரிவித்தார். மேலும், கேமரா முன் பேசிய அவர், “ஏ.பி., நீங்கள் இதைக் கேட்டுக் கொண்டிருந்தால், தயவுசெய்து என்னுடன் விரைவாகத் தொடர்பு கொள்ளுங்கள்.

ஏனெனில் எனது கிரிக்கெட் வாழ்க்கையில் முக்கியமான 3-4 ஆண்டுகள் உள்ளன. ஒருநாள் கிரிக்கெட்டில் நான் மீண்டும் சிறப்பாகச் செயல்பட நீங்கள் உதவ வேண்டும். சீக்கிரம் எனக்கு உதவுங்கள்!” என்று அவசர வேண்டுகோள் விடுத்துள்ளார்.

தற்போது ஆஸ்திரேலியாவுக்கு எதிரான டி20 தொடரில் விளையாடி வரும் சூர்யகுமாரின் இந்த திறந்த மனதுடன் கூடிய கோரிக்கை ரசிகர்கள் மத்தியில் ஆச்சரியத்தையும், பாராட்டையும் பெற்றுள்ளது.