சமீபத்தில் உலக கோப்பையை வென்ற இந்திய பெண் கிரிக்கெட் வீராங்கனைகள், ஒரு சில நாட்களுக்கு முன்பு வரை “அடுப்பங்கரைக்குத் திரும்புமாறு” விமர்சிக்கப்பட்டவர்கள்தான். ஆனால், இன்று இவர்களை தேசம் முழுவதும் கொண்டாடுகிறது. அனைவரையும் அமரச் சொல்லி, இவர்களைக் கவனிக்கச் செய்து, இவர்களுக்கு உரிய அங்கீகாரத்தையும் மதிப்பையும் கொடுக்கச் செய்துள்ளனர். இந்த மாபெரும் திருப்புமுனை இவர்களது வாழ்வில் என்ன மாதிரியான நிதி மற்றும் வணிகரீதியான தாக்கத்தை ஏற்படுத்தியுள்ளது?
பல விளையாட்டு வீரர்கள் தங்கள் கனவை அடையவும், அங்கீகாரத்தை பெறவும் வாழ்நாள் முழுவதும் போராடுகிறார்கள். ஆனால், இந்த வீராங்கனைகளை பொறுத்தவரை, குறிப்பாக ஹர்மன்பிரீத் கவுர் போன்ற மூத்த வீராங்கனைகள், நாட்டிற்கு பெருமை சேர்த்தாலும், அதற்கான எந்த பெரிய பொருளாதார பிரதிபலனும் அவர்களுக்கு கிடைக்கவில்லை.
ஆனால், சொந்த மண்ணில் வென்ற இந்த உலகக்கோப்பை வெற்றியானது எல்லாவற்றையும் மாற்றிவிட்டது. விளம்பர பிரவாகம் கட்டுக்கடங்காமல் பெருகி, உற்சாகம் வானை எட்டியுள்ளது. இந்த வீராங்கனைகள் ஒரே இரவில் சூப்பர் ஸ்டார்களாக மாறியுள்ளனர்.
ஐசிசி பரிசுத் தொகை: இந்த உலகக் கோப்பைப் போட்டியில் வரலாற்றிலேயே மிக அதிகமான பரிசுத் தொகை வழங்கப்பட்டது. இந்திய அணி மட்டும்சுமார் ரூ.37 கோடி பெற்றது. இதுமட்டுமல்லாமல், இந்திய கிரிக்கெட் கட்டுப்பாட்டு வாரியம் ஐசிசி-யின் வெற்றியாளர் பரிசை விட அதிகமாக, சுமார் ரூ.50 கோடி) கூடுதல் ரொக்க பரிசாக அறிவித்தது.
ஹிமாச்சலப் பிரதேச மாநிலம் வேகப்பந்து வீச்சாளர் ரியா சிங்குக்கு ரூ.1,20,000 ரொக்க பரிசு அறிவித்தது. மத்தியப் பிரதேச மாநிலம் கிராந்தி கௌலுக்கு அதே தொகையைவழங்கியது.
பஞ்சாப் கிரிக்கெட் சங்கம் கேப்டன் ஹர்மன்பிரீத் கவுர் மற்றும் அமன்ஜோத் கவுருக்கு ஒரு பெரும் தொகையை வழங்கியது. தீப்தி சர்மா உத்திரப் பிரதேசத்தில் டி.எஸ்.பி.யாக நியமிக்கப்பட்டார். ஒரு தொழிலதிபர் ஒவ்வொரு அணி உறுப்பினருக்கும் வைர நகைகள் மற்றும் சூரிய மின்சாரத்திற்கான சோலார் பேனல்களை வழங்குவதாக உறுதி அளித்தார்.
பணத்தை பெறுவதுடன் நின்றுவிடாமல், இந்த வெற்றியின் காரணமாக இந்த வீராங்கனைகளின் வர்த்தக மதிப்பு பெருமளவு உயர்ந்துள்ளது. உலகக் கோப்பை பிறகு, இந்த வீராங்கனைகள் வாங்கும் விளம்பரங்களுக்கான கட்டணம் கணிசமாக உயர்ந்துள்ளது. சிலருக்கு 25% முதல், இந்த தொடர் வரை பெரிய அளவில் கவனிக்கப்படாத சிலருக்கு 100% வரை கட்டணம் உயர்ந்துள்ளதாக தகவல்கள் தெரிவிக்கின்றன.
இந்த வெற்றியின் மையமாக இருந்த கேப்டன், துணைக் கேப்டன் மற்றும் சில இளம் நட்சத்திரங்களின் மீது பிரதானமாக கவனம் குவிந்துள்ளது. அவர்கள் விளம்பர கட்டணங்களில் 30 முதல் 50% வரை உயர்வை காண்பார்கள் என்று எதிர்பார்க்கப்படுகிறது.
உண்மை என்னவென்றால், சிறிது காலத்திற்கு முன்பு வரை வீட்டிலேயே இருக்க, அடுப்பூத மட்டுமே தகுதியானவர்கள் என்று கருதப்பட்ட இந்த வீராங்கனைகள், இப்போது மிகப்பெரிய வணிக சொத்துக்களாகவும், விளம்பர பிரசாரங்களின் முகங்களாகவும் மாறக்கூடிய தகுதி படைத்தவர்கள் என்று நிரூபிக்கப்பட்டுள்ளது.
இந்திய அணியின் கேப்டன் ஹர்மன்பிரீத் கவுரின் வரலாற்று சிறப்புமிக்க வெற்றியை நினைவுகூரும் வகையில், ஜெய்ப்பூரில் உள்ள நஹர்கர் கோட்டையில் அவருக்கு மெழுகுச்சிலை நிறுவப்பட உள்ளது. இந்த சிலை அடுத்த ஆண்டு சர்வதேச மகளிர் தினத்தில் திறக்கப்படும் என்று எதிர்பார்க்கப்படுகிறது. இந்த அங்கீகாரம், ரொக்கப் பரிசுகள் மற்றும் புகழ் ஆகியவற்றின் பொற்கால வேட்டையிலும் ஒரு உண்மை மறக்க முடியாதது:
இந்த வீராங்கனைகளின் வெற்றிக்கு கிடைத்த இந்த கவர்ச்சியான விளம்பர பிரவாகம் எவ்வளவு காலம் நீடிக்கும்? இது வீராங்கனைகளின் திறமையை பொறுத்தது அல்ல; ஏனெனில், அவர்கள் தங்கள் கடமையை மீண்டும் மீண்டும் நிரூபித்துள்ளனர். மாறாக, இது நம்மையும், விளம்பர நிறுவனங்களையும் பொறுத்தது. இன்று மட்டுமல்லாமல், வருங்காலங்களிலும் பிராண்டுகள் இந்த வீராங்கனைகளை, அவர்களின் வெற்றியின் காரணமாக மட்டுமல்லாமல், கடும் போராட்டங்களையும் தடைகளையும் தாண்டி அவர்கள் இங்கே வந்ததற்கான அவர்களின் உண்மையான மதிப்புக்காக அங்கீகரித்து ஆதரிக்குமா என்பதில்தான் இவர்களது நிலைத்த வணிக எதிர்காலம் உள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
Author: Bala Siva
