அமெரிக்காவில் தமிழ் கலாச்சாரத்தையும் சமூக சேவையையும் குறிக்கோளாகக் கொண்டு இயங்கும் வடக்கு டெக்சாஸ் தமிழ்ச் சங்கம் (NTTA), டல்லாஸில் நடந்த ஒரு கலை நிகழ்ச்சியை ஒட்டி, பிரபல யூடியூப் கலைஞர்கள் கோபி மற்றும் சுதாகர் ஆகியோரின் மேலாளருடன் ஏற்பட்ட ஒப்பந்தம் தொடர்பான சர்ச்சை குறித்து தகவல் வெளியாகி பரபரப்பை ஏற்படுத்தியுள்ளது.

சங்கம் வெளியிட்டுள்ள தகவலின்படி, நிகழ்ச்சி ஏற்பாடுகள் அனைத்தும் ஒப்பந்தப்படி, விமான டிக்கெட், நட்சத்திர ஹோட்டல், உணவு மற்றும் உள்ளூர் போக்குவரத்துச் செலவுகள் உட்பட அனைத்தையும் சங்கமே பொறுப்பேற்று நிறைவேற்றியது. ஆனால்  நிகழ்ச்சிக்கு முந்தைய நாள் கலைஞர்களின் விமானங்கள் ரத்து ஆன போதும், வடக்கு டெக்சாஸ் தமிழ்ச் சங்கம் கூடுதல் செலவுகளைச் செய்து, சரியான நேரத்தில் கலைஞர்கள் டல்லாஸ் வந்தடைய அனைத்து அவசர ஏற்பாடுகளையும் செய்ததாகத் தெரிவித்துள்ளது. நிகழ்ச்சி சிறப்பாக நடந்ததாகவும் சங்கம் குறிப்பிட்டுள்ளது.

இந்தச் சர்ச்சையின் மையப் புள்ளியாக இருப்பது, நிகழ்ச்சிக்கு முன் நடைபெற்ற வரவேற்பு நிகழ்ச்சி (Meet-and-Greet) ஆகும். இது பார்வையாளர்களைச் சந்தித்து, புகைப்படம் எடுத்து, உரையாடும் ஒரு வழக்கமான கலாச்சார அங்கமாகவே சங்கம் கருதுகிறது. இது நிகழ்ச்சிக் கட்டணத்தில் அடங்கும் என்பதே சங்கத்தின் நிலைப்பாடு.

ஆனால், கலைஞர் தரப்பு மேலாளரோ, இந்த வரவேற்பு நிகழ்ச்சியை தனிப்பட்ட நிகழ்வாகக் கருதுவதாகவும், இதற்கு இரட்டை கட்டணம் கோரியதாகவும் சங்கம் குற்றம் சாட்டியுள்ளது. இதுவே எதிர்பார்ப்பு முரண்பாட்டிற்கான முக்கியக் காரணமாகப் பார்க்கப்படுகிறது.

நிகழ்ச்சி முடிந்த பிறகும், மேலாளர் தரப்பில் இரட்டைக் கட்டணம் கோரப்பட்டதாகவும், பணம் தரப்படவில்லை என்றால் YouTube / வலைத்தளங்களில் சங்கத்தின் பெயரைப் பயன்படுத்தி எதிர்மறை வீடியோக்கள் வெளியிட்டு அவப்பெயரை உண்டாக்குவதாக வெளிப்படையாக மிரட்டியதாக வடக்கு டெக்சாஸ் தமிழ்ச் சங்கம் குற்றஞ்சாட்டுகிறது.

இச்சம்பவம், தன்னார்வத்துடன் சமூக சேவை நோக்கிய அமைப்புகளின் செயல்பாட்டு நடைமுறைக்கும், ஒரு கலைஞரின்/மேலாளரின் வணிக ரீதியான எதிர்பார்ப்புகளுக்கும் இடையே உள்ள முரண்பாடுகளை வெளிச்சம் போட்டுக் காட்டியுள்ளது.

வடக்கு டெக்சாஸ் தமிழ்ச் சங்கம் இந்தச் சம்பவத்தை ஒரு எச்சரிக்கை மணியாகக் கருதுவதாகவும், இனி வரும் காலங்களில் ஒப்பந்தங்களில் அதிக தெளிவு தேவை என்றும் குறிப்பிட்டுள்ளது.

இந்த விவகாரத்தில், ஒப்பந்த விதிமுறைகளில் உள்ள தெளிவற்ற தன்மை தான் இரு தரப்பினரின் எதிர்பார்ப்பு முரண்பாட்டிற்கு முக்கியக் காரணமாக அமைந்துள்ளது.