அரசு பேருந்துகளில் ‘தமிழ்நாடு’ என்ற பெயரைச் சேர்க்க வலியுறுத்தி நாம் தமிழர் கட்சியினர் நடத்திய போராட்டத்தின் போது, காவல்துறை வாகனத்திலேயே ஸ்டிக்கர் ஒட்ட முயன்ற சம்பவம் கரூரில் சிரிப்பலையை ஏற்படுத்தியுள்ளது.

ஆந்திரா, கர்நாடகா மற்றும் கேரளா போன்ற அண்டை மாநிலங்களில் உள்ள அரசுப் பேருந்துகளில் அந்தந்த மாநிலத்தின் பெயர் இடம்பெற்றுள்ளது. ஆனால், தமிழகத்தில் மட்டும் ‘அரசு போக்குவரத்து கழகம்’ என்று மட்டுமே குறிப்பிடப்பட்டுள்ளது. எனவே, மற்ற மாநிலங்களைப் போலவே இங்கும் ‘தமிழ்நாடு அரசுப் போக்குவரத்து கழகம்’ என பெயர் மாற்றம் செய்ய வேண்டும் என்று நாம் தமிழர் கட்சி சார்பில் மாநிலம் தழுவிய போராட்டங்கள் முன்னெடுக்கப்பட்டு வருகின்றன.