விஜய் நடிப்பில் உருவாகியுள்ள ‘ஜனநாயகன்’ திரைப்படத்திற்கு தணிக்கை சான்றிதழ் வழங்குவதில் ஏற்பட்டுள்ள தாமதம் குறித்து தமிழ்நாடு காங்கிரஸ் கமிட்டியின் முன்னாள் தலைவர் கே.எஸ். அழகிரி கடும் கண்டனம் தெரிவித்துள்ளார். ஒரு திரைப்படத்திற்கு தணிக்கை சான்றிதழ் அளிப்பதில் உள்நோக்கத்துடன் முட்டுக்கட்டை போடுவது ஜனநாயகம் அல்ல என்றும், அவ்வாறு திட்டமிட்டு செயல்படுவது மிகவும் தவறானது என்றும் அவர் குறிப்பிட்டுள்ளார்.

மேலும் ஏற்கனவே தணிக்கை குழு படத்தை பார்த்து சில மாற்றங்களை பரிந்துரைத்த நிலையில், அவற்றை படக்குழுவினர் சரிசெய்து வழங்கிய பின்னரும் சான்றிதழ் வழங்காமல் காலதாமதம் செய்வது பல்வேறு சந்தேகங்களை எழுப்புவதாக அவர் தனது அறிக்கையில் சுட்டிக்காட்டியுள்ளார். திரைப்படம் என்பது ஒரு படைப்பு சுதந்திரம் சார்ந்த விஷயம் என்றும், இதில் அரசியல் காரணங்களுக்காகவோ அல்லது உள்நோக்கத்துடனோ தலையிடுவது கருத்து சுதந்திரத்திற்கு எதிரானது என அழகிரி விவரித்துள்ளார்.

இந்நிலையில் ‘ஜனநாயகன்’ திரைப்படத்தின் வெளியீடு நெருங்கி வரும் சூழலில், இத்தகைய முட்டுக்கட்டைகள் தயாரிப்பாளர்களுக்கு பெரும் நிதி இழப்பையும், ரசிகர்களுக்கு ஏமாற்றத்தையும் தரும் என அவர் கவலை தெரிவித்துள்ளார். எனவே, இந்த விவகாரத்தில் நியாயமான முறையில் செயல்பட்டு, எவ்வித உள்நோக்கமும் இன்றி உடனடியாக தணிக்கை சான்றிதழை வழங்க வேண்டும் என அவர் மத்திய தணிக்கை வாரியத்தை வலியுறுத்தியுள்ளார்.