உத்தரப்பிரதேச மாநிலம் ஜான்சியில் ஓய்வு பெற்ற ரயில்வே ஊழியர் ஒருவர் தனது 35 வயது லிவ்-இன்-பார்ட்னர் பெண்ணைக் கொலை செய்து உடலை இரும்புப் பெட்டியில் வைத்து எரித்த சம்பவம் பெரும் அதிர்ச்சியை ஏற்படுத்தியுள்ளது. ராம் சிங் பரிஹார் என்ற அந்த நபர் ஏற்கனவே இரண்டு திருமணங்கள் செய்தவர் என்பதுடன் பிரீதி என்ற பெண்ணுடன் குடும்பம் நடத்தி வந்துள்ளார்.

பிரீதி தொடர்ந்து பணம் கேட்டு வற்புறுத்தியதால் ஆத்திரமடைந்த ராம் சிங் அவரைக் கொலை செய்து ஆதாரங்களை மறைக்க உடலைத் தகனம் செய்துள்ளார். அதன் பிறகு சாம்பலை ஆற்றில் கரைத்துவிட்டு மீதமிருந்த எலும்புத் துண்டுகள் மற்றும் எரிக்கப்பட்ட உடல் பாகங்கள் அடங்கிய இரும்புப் பெட்டியை தனது இரண்டாவது மனைவியின் வீட்டிற்கு அனுப்பியுள்ளார்.

அந்தப் பெட்டியை ஏற்றிச் சென்ற வாகன ஓட்டுநருக்கு ஏற்பட்ட சந்தேகத்தின் அடிப்படையில் காவல் துறைக்குத் தகவல் தெரிவிக்கப்பட்டது. போலீசார் அந்தப் பெட்டியைத் திறந்து பார்த்தபோது அதில் கருகிய நிலையில் மனித உடல் பாகங்களும் எலும்புகளும் இருப்பதைக் கண்டு அதிர்ச்சியடைந்தனர். இது குறித்துப் போலீசார் நடத்திய முதற்கட்ட விசாரணையில் கடந்த ஜனவரி எட்டாம் தேதி இந்தத் துயரச் சம்பவம் நடந்திருக்கலாம் என்று சந்தேகிக்கப்படுகிறது.

தற்போது தப்பியோடிய முக்கியக் குற்றவாளியைத் தேடி வரும் காவல்துறையினர் கொலைக்கு உதவியதாகக் கூறப்படும் அவரது மகன் உள்ளிட்ட இரண்டு பேரைத் தடுத்து வைத்து விசாரணை நடத்தி வருகின்றனர்.