अभिनेता रितेश देशमुख आणि जिनिलिया डिसूझा देशमुख ही बॉलिवूड इंडस्ट्रीतील सर्वांत लोकप्रिय जोड्यांपैकी एक आहे. या दोघांच्या लग्नाला 14 वर्षे पूर्ण झाली असून यानिमित्त जिनिलियाने तिच्या इन्स्टाग्रामवर लग्नसोहळ्याचे खास फोटो पोस्ट केले आहेत.

'आय लव्ह यू पार्टनर.. आज, उद्या आणि कायम. आयुष्याच्या या सुंदर कथेतील तू कायम माझा सर्वांत आवडता अध्याय राहशील', अशा शब्दांत जिनिलियाने रितेशबद्दलच्या भावना व्यक्त केल्या आहेत. या फोटोंवर नेटकऱ्यांनी लाइक्स आणि कमेंट्सचा वर्षाव केला आहे.

'तुझे मेरी कसम' या चित्रपटाच्या सेटवर रितेश आणि जिनिलियाची पहिली भेट झाली होती. त्यानंतर चित्रपटाच्या शूटिंगदरम्यान दोघांमध्ये चांगली मैत्री झाली आणि हळूहळू या मैत्रीचं रुपांतर प्रेमात झालं. लग्नापूर्वी हे दोघं जवळपास 10 वर्षे एकमेकांना डेट करत होते.

रितेश आणि जिनिलायने 3 फेब्रुवारी 2012 रोजी लग्नगाठ बांधली. लग्नाच्या दोन वर्षांनंतर जिनिलियाने रियानला जन्म दिला. त्यानंतर 2016 मध्ये जिनिलिया आणि रितेश यांना दुसरा मुलगा झाला. त्याचं नाव राहील असं आहे.

लग्नानंतर संसार आणि मुलाबाळांच्या संगोपनासाठी जिनिलियाने अभिनयातून काही काळ ब्रेक घेतला होता. त्यानंतर ती पुन्हा इंडस्ट्रीत परतली असून 'वेड' या चित्रपटात रितेश आणि जिनिलिया ही जोडी एकत्र मोठ्या पडद्यावर झळकली.