பிரச்சாரத்தில் தவெக தலைவர் விஜய், வரவிருக்கும் தேர்தல் என்பது ‘டெல்லி அணிக்கும் தமிழ்நாடு அணிக்கும்’ இடையிலான போட்டி எனக் குறிப்பிட்டிருந்தார். இதற்குப் பதிலளித்த தமிழிசை சௌந்தரராஜன், “விஜய் விளையாட்டை வைத்து விளையாட்டாகப் பேசுகிறார்” என எள்ளி நகையாடினார். “தேர்தல் என்பது வெறும் எமோஷன் (Emotion) மட்டும் கிடையாது; இது தமிழ்நாட்டின் ப்ரமோஷனுக்கான (Promotion) தேர்தல். வெறும் வார்த்தை ஜாலங்களால் நாட்டை முன்னேற்ற முடியாது” என்று அவர் காட்டமாகத் தெரிவித்தார். மேலும், தமிழகத்தில் ஊழலற்ற மற்றும் நிலையான ஆட்சி அமைய வேண்டுமென்றால் தேசிய ஜனநாயக கூட்டணி (NDA) வெற்றி பெற வேண்டியது அவசியம் என்று அவர் வலியுறுத்தினார்.

தொடர்ந்து பேசிய தமிழிசை, “2026-ல் தமிழகத்தில் அதிமுக மற்றும் பாஜக உள்ளிட்ட கட்சிகள் அடங்கிய தேசிய ஜனநாயகக் கூட்டணிதான் ஆட்சிக்கு வரும். எடப்பாடி பழனிசாமி அவர்களின் தலைமையிலான ஆட்சி அமைவதே தமிழகத்தின் முன்னேற்றத்திற்கு வழிவகுக்கும்” என்று உறுதிபடக் கூறினார். விஜய்யின் அரசியல் வருகை இளைஞர்கள் மத்தியில் தாக்கத்தை ஏற்படுத்தினாலும், நிர்வாக ரீதியான அனுபவமும் வலுவான கூட்டணி அமைப்பும் கொண்ட அணியே வெற்றி பெறும் என அவர் நம்பிக்கை தெரிவித்தார். தமிழிசையின் இந்தத் தொடர் விமர்சனங்கள், தமிழக அரசியல் களம் ஒரு மும்முனைப் போட்டியை நோக்கி நகர்வதை உறுதிப்படுத்தியுள்ளன.