2026 டி20 உலகக்கோப்பையின் இறுதிப்போட்டி வரும் மார்ச் 8-ம் தேதி அகமதாபாத்தில் நடைபெற உள்ளது. சூர்யகுமார் யாதவ் தலைமையிலான இந்திய அணி, அரையிறுதியில் இங்கிலாந்தை வீழ்த்தி இறுதிப்போட்டிக்கு முன்னேறியுள்ளது. கடந்த உலகக்கோப்பை வெற்றியாளரான இந்தியா, இம்முறையும் கோப்பையை வெல்லும் முனைப்பில் உள்ளது.

ஆனால், சூப்பர் 8 சுற்றில் தென் ஆப்பிரிக்காவிடம் தோல்வியைத் தழுவிய இந்திய அணி, இந்த முக்கியமான இறுதிப்போட்டியில் சில மாற்றங்களைச் செய்யத் திட்டமிட்டுள்ளதாகக் கூறப்படுகிறது. குறிப்பாக, தொடர்ச்சியாக ரன் குவிக்கத் திணறும் தொடக்க ஆட்டக்காரர் அபிஷேக் ஷர்மாவுக்குப் பதிலாக ரிங்கு சிங்கை களமிறக்க ஆலோசனைகள் நடைபெறுகின்றன. ரிங்கு சிங் அணியில் இணைந்தால், சஞ்சு சாம்சன் மற்றும் இஷான் கிசன் தொடக்க வீரர்களாகவும், ரிங்கு சிங் சிறந்த பினிஷராகவும் செயல்பட்டு பேட்டிங் வரிசையை வலுப்படுத்துவார்கள் என்று எதிர்பார்க்கப்படுகிறது.

பந்துவீச்சிலும் ஒரு முக்கிய மாற்றத்தைப் பரிசீலித்து வருகிறது இந்திய அணி. தொடரின் தொடக்கத்தில் சிறப்பாகப் பந்துவீசிய வருண் சக்கரவர்த்தி, சூப்பர் 8 மற்றும் அரையிறுதிப் போட்டிகளில் அதிக ரன்களைக் கொடுத்து தடுமாறினார். எனவே, அவருக்குப் பதிலாக நியூசிலாந்து அணிக்கு எதிராகச் சிறந்த ரெக்கார்டு வைத்துள்ள குல்தீப் யாதவை அணியில் சேர்க்கத் திட்டமிட்டுள்ளது.

அகமதாபாத் மைதானம் சுழற்பந்து வீச்சுக்கு ஓரளவுக்கு ஒத்துழைக்கும் என்பதால், குல்தீப்பின் அனுபவம் மற்றும் விக்கெட் வீழ்த்தும் திறன் இறுதிப்போட்டியில் இந்திய அணிக்கு பெரும் பலமாக அமையும் என்று நம்பப்படுகிறது.
இருப்பினும், இவ்வளவு தூரம் அணி வெற்றி பெற்று வருவதற்கு அபிஷேக் ஷர்மா மற்றும் வருண் சக்கரவர்த்தியின் பங்களிப்பும் முக்கியமானது. இறுதிப்போட்டி போன்ற மிக முக்கியமான தருணத்தில் அணியின் சமநிலையை மாற்றுவது ரிஸ்க்கான முடிவாக இருக்குமா என்ற சந்தேகமும் நிலவுகிறது.

இருப்பினும், நியூசிலாந்து அணியின் அதிரடி ஆட்டத்தைக் கட்டுப்படுத்த இந்த மாற்றங்கள் அவசியமாக இருக்கலாம் என்றும் நிபுணர்கள் கருதுகின்றனர். இந்திய ரசிகர்கள் பெரிதும் எதிர்பார்க்கும் இந்த இறுதிப்போட்டியில், எந்த மாதிரியான ஆடும் லெவன் களமிறங்கப்போகிறது என்பதுதான் தற்போதைய மிகப்பெரிய எதிர்பார்ப்பாக உள்ளது.