आयपीएल स्पर्धेच्या 19 व्या मोसमातील तयारी शेवटच्या टप्प्यात आहे. एकूण 10 संघांनी आतापर्यंत जोरदार सराव केला आहे. काही संघातील खेळाडूंना दुखापतीमुळे या संपूर्ण मोसमाला मुकावं लागलं आहे. तर काही खेळाडूंना दुखापतीमुळे सुरुवातीच्या काही सामन्यांत खेळता येणार नाही. त्यामुळे संघात त्या त्या खेळाडूंच्या जागी दुसऱ्या क्रिकेटपटूंचा समावेश करण्यात आला आहे. अशात आता मुख्य सामन्यांआधी खेळाडूंना जास्तीत जास्त सराव व्हावा या हेतूने आपल्याच संघातील खेळाडूंना 2 गटात विभागून सामने खेळवण्यात येत आहेत.
आयपीएलच्या 19 व्या मोसमाचा थरार हा 28 मार्चपासून रंगणार आहे. रॉयल चॅलेंजर्स बंगळुरु या मोसमात गतविजेता म्हणून उतरणार आहे. आरसीबीसमोर या मोसमात ट्रॉफी कायम राखण्याचं आव्हान असणार आहे. त्याआधी रविवारी 22 मार्च रोजी आरसीबी टीममध्ये एन्ट्रा स्क्वाड मॅच झाली. या सामन्यासाठी आरसीबीच्या खेळाडूंना 2 संघात विभागण्यात आलं.
टीम कृणाल (कृणाल पंड्या) विरुद्ध टीम वेंकी (वेंकटेश अय्यर) यांच्यात हा सामना झाला. विराट कोहली, जितेश शर्मा आणि टीम डेव्हिड आणि इतर खेळाडू हे वेंकटेश अय्यर याच्या टीममध्ये होते. तर कृणालच्या टीममध्ये देवदत्त पडीक्कल, नियमित कर्णधार रजत पाटीदार आणि इतर खेळाडूंचा समावेश होता.
या सराव सामन्यात दोन्ही बाजूने जोरदार फटकेबाजी पाहायला मिळाली. मात्र टीम कृणालने मैदान मारलं. टीम कृणालने हा सामना 13 धावांनी जिंकला. टीम कृणालमधील फलंदाजांनी तडाखेदार बॅटिंग करत 200 पार मजल मारली. टीम कृणालने 4 विकेट्स गमावून 247 धावा केल्या. प्रत्युत्तरात टीम वेंकीनेही जोरदार प्रतिकार केला. मात्र त्यांचे प्रयत्न अवघ्या काही धावासांठी कमी पडले. टीमी वेंकीने 7 विकेट्स गमावून 234 धावा केल्या.
टीम कृणालसाठी या सराव सामन्यात रजत पाटीदर, देवदत्त पडीक्कल आणि कृणाल पंड्या या तिघांनी अर्धशतक झळकावलं. रजतने 74,देवदत्तने 63 आणि कृणालने 58 धावांचं योगदान दिलं.
गतविजेता आरसीबीचा सराव सामना, फलंदाजांची जोरदार बॅटिंग
तर टीम वेंकीसाठी जितेश शर्मा याने चाबूक खेळी केली. जितेशने फक्त 37 बॉलमध्ये 81 रन्स ठोकल्या. ऑलराउंडर टीम डेव्हिड याने 14 बॉलमध्ये 36 रन्स केल्या. तर कॅप्टन वेंकटेश अय्यर याने 16 चेंडूत 30 धावांची खेळी केली. तर रनमशीन विराट कोहली याने 29 धावा जोडल्या.
