கடந்த 2013-ம் ஆண்டு பி.டெக் படித்துக் கொண்டிருந்தபோது, கல்லூரி விடுதியின் மாடியிலிருந்து எதிர்பாராத விதமாகத் தவறி விழுந்த ஹரிஷ் ராணா என்ற இளைஞரின் வாழ்க்கை அன்றோடு தலைகீழாக மாறியது.

இந்த விபத்தில் மூளையில் பலத்த காயமடைந்த அவர், கடந்த 13 ஆண்டுகளாகக் கோமா நிலையிலேயே மருத்துவமனையில் சிகிச்சை பெற்று வந்தார்.

தனது மகன் படும் வேதனையைத் தாங்க முடியாமலும், இனி அவர் இயல்பு நிலைக்குத் திரும்ப வாய்ப்பில்லை என்பதாலும், அவருக்குக் ‘கருணைக் கொலை’ செய்ய அனுமதி வழங்க வேண்டும் என அவரது பெற்றோர் உச்ச நீதிமன்றத்தில் உருக்கமாகக் கோரிக்கை விடுத்தனர்.

இந்த நீண்ட காலப் போராட்டத்தை விசாரித்த நீதிமன்றம், மருத்துவ அறிக்கைகளின் அடிப்படையில் இறுதியாகக் கருணைக் கொலைக்கு அனுமதி அளித்தது.

இதன்படி, உயிர் காக்கும் கருவிகள் அகற்றப்பட்டு 10 நாட்களுக்குப் பிறகு, ஹரிஷ் ராணா இன்று அமைதியாகக் காற்றோடு கலந்தார். ஒரு திறமையான இளைஞனின் வாழ்வு இப்படிச் சோகமாக முடிந்தது ஒட்டுமொத்த நாட்டையுமே கண்ணீரில் ஆழ்த்தியுள்ளது.