पश्चिम बंगाल विधानसभा निवडणुकीच्या पार्श्वभूमीवर भाजपने उमेदवारांची तिसरी यादी जाहीर केली आहे. या यादीत एकूण 19 उमेदवारांची नावे आहेत, ज्यामध्ये अनेक नवीन चेहऱ्यांना संधी देण्यात आली आहे. पक्षाने उत्तर 24 परगणा जिल्ह्यातील महत्त्वाची मानली जाणारी पानिहाटी मतदारसंघातून आर जी कर मेडिकल कॉलेज रेप-मर्डर प्रकरणातील पीडितेची आई रत्ना देबनाथ यांना उमेदवारी दिली आहे. यावर बोलताना केंद्रीय शिक्षण मंत्री आणि भाजपचे नेते धर्मेंद्र प्रधान यांनी भाष्य केले आहे.

धर्मेंद्र प्रधान यांनी म्हटले की, रत्ना देबनाथ यांना भाजपने पानिहाटी येथून निवडणूक मैदानात उतरणे ही केवळ उमेदवारी नाही, तर बंगालच्या मुली आता गप्प बसणार नाहीत, याची ती एक ठाम घोषणा आहे. एका आईच्या दुःखाने आता न्यायासाठीच्या अढळ लढ्यात रूपांतर घेतले आहे. त्यांचा आवाज आता न्याय, सन्मान आणि राज्यभरातील महिलांच्या सुरक्षेसाठीच्या चळवळीत परिवर्तित झाला आहे.

Ratna Debnath stepping into the electoral arena from Panihati with @BJP4India is not just a candidacy – it is a powerful assertion that Bengal’s daughters will no longer be silenced. A mother’s grief has transformed into an unyielding pursuit of justice.

Her voice has now grown…

— Dharmendra Pradhan (@dpradhanbjp)

महिलांच्या सुरक्षेच्या बाबतीत ममता बॅनर्जी आणि तृणमूल काँग्रेस यांच्या वारंवार झालेल्या अपयशामुळे जनतेचा विश्वास ढासळला आहे. त्यांच्या कारकिर्दीत असंख्य आवाज दाबले गेले, प्रत्येक आवाज ही त्या व्यवस्थेच्या अपयशाची जाणीव करून देतो, जी आपल्या मुलींना सुरक्षित ठेवण्यात अपयशी ठरली आहे. ही फक्त निवडणूक नाही, हा नैतिक हिशेब आहे. एका आईचे धैर्य आता एका मोडकळीस आलेल्या व्यवस्थेला थेट आव्हान देत आहे. वैयक्तिक दुःखाला सामूहिक न्याय, जबाबदारी आणि बंगालमधील प्रत्येक मुलीसाठी दीर्घकालीन बदलाच्या मागणीत रूपांतरित करत आहे.

दरम्यान, पश्चिम बंगाल विधानसभा निवडणुका दोन टप्प्यांत 23 एप्रिल आणि 29 एप्रिल 2026 रोजी होणार असून निकाल 4 मे रोजी जाहीर होणार आहेत. बंगाल निवडणुकांसाठी भाजपने आपल्या पहिल्या यादीत 144 आणि दुसऱ्या यादीत 111 उमेदवारांची घोषणा केली होती. 19 नावांच्या तिसऱ्या यादीसह पक्षाने आतापर्यंत एकूण 274 जागांवर उमेदवार जाहीर केले आहेत. पश्चिम बंगाल विधानसभेत एकूण 294 जागा आहेत. या निवडणुकीकडे संपूर्ण राज्याचे लक्ष लागलेले आहे.