रीलस्टार संतोष पंडितवर विनयभंगाचा गुन्हा

पुणे पोलिसांकडून रीलस्टारवर कारवाई

पर्वती पोलीस ठाण्यात गुन्हा दाखल

पुण्यातील रीलस्टार संतोष पंडितवर विनयभंगाचा गुन्हा दाखल करण्यात आला आहे. महिला पत्रकाराचा विनयभंग केल्याप्रकरणी संतोष पंडितवर पुण्यात गुन्हा दाखल करण्यात आलाय. मानवतेच्या आणि ज्ञान पाजळणाऱ्या रील्स तयार करून समाज प्रबोधन करणाऱ्या पंडितवर पुणे पोलिसांकडून कारवाई करण्यात आली आहे.

पुण्यातील पर्वती पोलीस ठाण्यात विनयभंगासह महिला पत्रकाराची सहमती नसताना व्हिडिओ तयार केल्याप्रकरणी गुन्हा दाखल करण्यात आलाय. पुण्यात झालेल्या "गुलाबो गँग"च्या आंदोलनावेळी संतोष पंडितकडून महिला पत्रकाराशी असभ्य वर्तवणूक करण्यात आली. या प्रकरणी महिला पत्रकाराने पोलिसांत तक्रार दिली आहे.

पोलिसांनी दिलेल्या माहितीनुसार, पंडितकडून हा सगळा प्रकार ३० मार्च रोजी पुण्यातील ग्राहक पेठेसमोर घडला. सामाजिक कार्यकर्त्या संगिता तिवारी या नाशिक येथील अशोक खरात प्रकरणाच्या विरोधात सोमवारी सकाळी आंदोलन करत होत्या. यावेळी तक्रारदार पत्रकार या नात्याने आंदोलनाचे वृत्तांकन करण्यासाठी उपस्थित होत्या.यावेळी संतोष पंडित त्याठिकाणी आला.

'तुमच्यामुळे वाहतूक कोंडी होत आहे,' असे म्हणून पत्रकारांविषयी अर्वाच्च भाषा वापरुन शिवीगाळ केली. तसेच महिला पत्रकाराच्या अंगावरील कपड्यांवरुन अश्लील शेरेबाजी केली. तसंच त्याने त्याच्या फोनमध्ये व्हिडिओ कैद केला. आंदोलनकर्त्या महिलांचे अंगावर धावून जाऊन शिवीगाळ आणि दमदाटी केली.

या प्रकरणी पंडितवर पुण्यातील पर्वती पोलीस ठाण्यात भारतीय न्याय संहिता कलम ७५, ७८, ३५२, ३५१ (२) आणि २९६ अन्वये गुन्हा दाखल करण्यात आला आहे. याप्रकरणी पुढील तपास सुरू असून संतोष पंडित याच्या विरोधात इतर लोकांच्या काही तक्रारी असल्यास जवळच्या पोलिस ठाण्यात संपर्क साधण्याचे आवाहन सुद्धा पोलिसांनी केलं आहे.