आयपीएल स्पर्धेतील पाचवा आणि पहिल्या फेरीतील शेवटचा सामना दिल्ली कॅपिटल्स आणि लखनौ सुपर जायंट्स यांच्यात होत आहे. या दोन्ही संघाची मागच्या पर्वात सुमार कामगिरी राहिली. दिल्ली कॅपिटल्सने विजयी सुरूवात केली होती. मात्र त्यानंतर गाडी रूळावरून घसरली आणि प्लेऑफमध्ये जागा मिळवता आली नाही. दुसरीकडे, लखनौ सुपर जांयट्सही काही खास करू शकली नाही. असं असताना दोन्ही संघांना या स्पर्धेत विजयी सुरूवात हवी आहे. हा सामना लखनौच्या इकाना स्टेडियममध्ये होत आहे. लखनौ सुपर जायंट्सची धुरा ऋषभ पंतच्या हाती, तर दिल्ली कॅपिटल्सचं नेतृत्व अक्षर पटेल करणार आहे. तर दोन्ही संघ या सामन्यासाठी कोणत्या प्लेइंग 11 सह उतरणार याचीही उत्सुकता आहे. अर्जुन तेंडुलकरला प्लेइंग 11 मध्ये स्थान मिळेल की नाही? हे देखील पाहणं औत्सुक्याचं ठरेल.
आयपीएल स्पर्धेत दिल्ली कॅपिटल्स आणि लखनौ सुपर जायंट्स यांच्यात सात सामने झाले आहेत. यात दिल्ली कॅपिटल्स थोडं पुढे आहे. दिल्ली कॅपिटल्सने 4, तर लखनौ सुपर जायंट्सने 3 सामन्यात विजय मिळवला आहे. मागच्या पर्वात दोन सामने पार पडले आणि दोन्ही सामन्यात दिल्लीने बाजी मारली. 2024 या पर्वातही दिल्ली कॅपिटल्सने दोन्ही सामने जिंकले होते. म्हणजेच लखनौ सुपर जायंट्सला शेवटचा विजय आयपीएल 2023 स्पर्धेत मिळाला होता.
इकाना स्टेडियममधील खेळपट्टी ही काळ्या मातीची आहे. त्यामुळे या खेळपट्टीवर फिरकीला मदत होते. या खेळपट्टीवर 200 पार धावा करणं सोपं नाही. मागच्या काही सामन्यात याची अनुभूती आली आहे. या खेळपट्टीवर पहिल्या डावात 170 ते 180 धावा होऊ शकतात. पण धावांचा पाठलाग करणं वाटतं तितकं सोपं नाही. त्यामुळे नाणेफेकीचा कौल जिंकल्यानंतर कर्णधार काय निवडतात याकडे लक्ष असणार आहे.
1 एप्रिल 2026 रोजी हा सामना होत आहे. अॅक्युवेदरच्या रिपोर्टनुसार, या दिवशी आकाश निरभ्र राहिल. तर कमाल तापमान 36 डिग्री, तर किमान तापमाना हे 23 डिग्री राहील. त्यामुळे पावसाची शक्यताच नाही. त्यामुळे हा सामना 20 षटकांचा होणार, यात काही शंका नाही.
