Pune Rain Update: पुणे शहरात गुरुवारी दुपारी आलेल्या वादळी पावसाने शहराला अक्षरशः झोडपून काढले. या अवकाळी पावसाने पुण्यात 130 वर्षांनंतरचा विक्रम मोडीत काढला असला, तरी सिंहगड रस्ता परिसरात एक अत्यंत हृदयद्रावक घटना घडली आहे. एका मंदिराशेजारी गेल्या 15-20 वर्षांपासून फूल विक्री करणाऱ्या रंजना नवनाथ गिरी (वय 60) यांच्या अंगावर वडाचे भलेमोठे झाड कोसळल्याने त्यांचा जागीच मृत्यू झाला.
रंजना गिरी (रा. दत्तवाडी) या गेल्या दोन दशकांपासून सिंहगड रस्त्यावरील एका मंदिराशेजारी आपली हातगाडी लावून फुले विकत होत्या. उन्हात आणि पावसात त्यांना याच वडाच्या झाडाने नेहमी आसरा दिला. मात्र, काल दुपारी अचानक सुटलेल्या वादळी वाऱ्यामुळे हेच वडाचे झाड कोसळले. या झाडाखाली रंजना यांच्यासह तिघेजण अडकले होते. पर्वती पोलिसांनी तातडीने घटनास्थळी धाव घेत दोघांना सुखरूप बाहेर काढले, मात्र रंजना गिरी यांचा या दुर्घटनेत दुर्दैवी अंत झाला. त्यांच्या पश्चात पती, तीन मुलगे आणि एक मुलगी असा परिवार आहे.
हवामान विभागाने दिलेल्या माहितीनुसार, पुण्यात काल झालेला पाऊस हा एप्रिल महिन्यातील एका दिवसात झालेला गेल्या 130 वर्षांतील सर्वाधिक पाऊस ठरला आहे.
2026 ची नोंद: 65 मिलिमीटर.
यापूर्वीचा विक्रम: 1896 मध्ये 51.1 मिलिमीटर पावसाची नोंद झाली होती. अचानक आलेल्या या मुसळधार पावसामुळे नागरिकांची मोठी तारांबळ उडाली.
केवळ झाड कोसळण्याच्या घटनाच नाही, तर पुण्यातील गंगाधाम चौकात एक अजस्त्र होर्डिंग देखील वादळी वाऱ्यामुळे कोसळले. सुदैवाने यात कोणतीही जीवितहानी झाली नाही, मात्र शहराच्या मुख्य रस्त्यांवर मोठ्या प्रमाणात वाहतूक कोंडी झाली होती. पुण्याच्या ग्रामीण भागातही अनेक ठिकाणी गारपीट झाल्याचे वृत्त आहे, ज्यामुळे शेती पिकांचे मोठे नुकसान झाले आहे. तर पुण्यात काल झालेल्या मुसळधार पावसाचा फटका मंदिरांना देखील बसला. पुण्यातील प्रसिद्ध श्रीमती लक्ष्मीबाई दगडूशेठ हलवाई दत्त मंदिरात पाणी साचलेलं होतं. काल गुरुवार असल्याने भाविक या दत्त मंदिरात मोठ्या संख्येने दर्शनासाठी येत असतात. मात्र या मंदिरामध्ये देखील पाणी साचल्याने भाविकांना अडचणींचा सामना करावा लागला.
इतर महत्त्वाच्या बातम्या
