நேர்மையான எளிய வாழ்க்கையை வாழ்ந்து வருகிறார் கார் டிரைவர் செல்வம் (சமுத்திரக்கனி). அவரின் வாழ்வில் அடுத்தடுத்து நடக்கும் இரு நிகழ்வுகள் அவர் மனதுக்குப் பிடிக்காத ஒரு முடிவினை எடுக்கவைக்கிறது.

அந்த முடிவின் தொடர்ச்சியாக, ஆடம்பர வாழ்க்கை வாழ ஆசையும் வருகிறது. அதற்காக அவர் எடுக்கிற முயற்சிகள் எந்த மாதிரியான விளைவுகளை ஏற்படுத்துகின்றன என்பதைத் தனது 'கார்மேனி செல்வம்' படத்தின் மூலம் சொல்லியிருக்கிறார் அறிமுக இயக்குநர் ராம் சக்ரி.

Carmeni Selvam Review |கார்மேனி செல்வம் விமர்சனம்

அன்பான அப்பா, நேர்மையான கார் டிரைவர், அப்பாவியான கணவன் என செல்வமாக சமுத்திரக்கனி. 'சமுத்திரகனியிஸம்' நிறைந்த கதைதான் என்றாலும் கருத்து ஊசிகள் இல்லாமல், முக்கிய காட்சிகளில் தன் அனுபவ நடிப்பை வெளிப்படுத்தியிருக்கிறார்.

செல்வத்தின் மனைவி சாந்தியாக லட்சுமி பிரியா சந்திரமௌலி, விளிம்பு நிலை குடும்பத் தலைவியாக இயல்பான நடிப்பை வழங்கியிருக்கிறார்.

உறவினர்களுக்கு மத்தியில் அவமானப்படும்போது கிளம்புகிற வைராக்கியம், தன் கணவனிடம் பொருளாதார நிலைகுறித்து புரியவைக்கப் பொருமுதல், அதே கணவன் சிக்கலில் மாட்டிக்கொள்கிற பொழுதில் ஏற்படுகிற பரிதாபம் எனப் பொருத்தமாக நடித்திருப்பது கதைக்கு அழுத்தம் கூட்டுகிறது.

காளிதாஸ் 2 விமர்சனம்: காணாமல் போகும் குழந்தை; த்ரில் சேர்க்கிறதா இந்த பரபர போலீஸ் விசாரணை?

இவர்கள் தவிர கௌதம் வாசுதேவ் மேனன், அபிநயா தங்களுக்குக் கொடுக்கப்பட்ட பாத்திரங்களுக்கு நியாயம் சேர்த்திருக்கிறார்கள்.

சிறிய கதாபாத்திரமாக இருந்தாலும் கார்த்திக்குமாரும், படவா கோபியும் கொடுத்த வேலையைச் சிறப்பாகச் செய்திருக்கிறார்கள்.

Carmeni Selvam Review |கார்மேனி செல்வம் விமர்சனம்

சென்னை, துபாய் எனக் குறைவான லொகேசன்களில் நடக்கிற எளிமையான கதைக்கேற்ற ஒளிப்பதிவையும், எடிட்டிங்கையும் வழங்கியிருக்கிறது ஒளிப்பதிவாளர் யுவராஜ் தக்ஷன் மற்றும் படத்தொகுப்பாளர்கள் ஜெகன் ஆர்.வி - தினேஷ்.எஸ் அடங்கிய தொழில்நுட்பக் குழு.

பாடல்கள் பெரிய அளவில் ஈர்க்காத நிலையில், பின்னணி இசையில் சில காட்சிகளில் கவனிக்க வைத்திருக்கிறது மியூசிக் கிளவுட் ஸ்டுடியோ & டெக்னாலஜி குழு.

Leader Review: ஆக்ஷன் தெறிக்கும் `ஓஜி' டெம்ப்ளேட் சினிமா - இந்த லெஜண்ட் லீடர் ஆகிறாரா?

நேர்மையான டிரைவராக வாழும் சமுத்திரக்கனியின் மகிழ்ச்சியான வாழ்க்கையில் தொடங்கும் கதை, தடுமாற்றம், ஏமாற்றம், வெளிநாட்டு வேலை எனப் பல தளங்களில் பயணிக்கிறது.

ஆனால், படம் சொல்ல வருகிற கருத்து தெளிவானதாக இல்லாமல் ஏகத்துக்கும் குழப்பத்தை உண்டாக்கியிருக்கிறது. டாக்சியில் ஏறி பணம் தராமல் ஓடிவிடுபவர்களாகச் சித்திரிக்கப்படும் இளைஞர்கள் குறித்த அந்த எபிசோடு, லைப் இன்சூரன்ஸ் குறித்த அச்ச உணர்வு, தன் வாழ்நிலையை முன்னேற்றிக் கொள்ள நடுத்தர குடும்பத்தினரின் வழிகளில் ஒன்றாக இருக்கும் கிரெடிட் கார்டு குறித்த கேலி எனப் பல விஷயங்களைச் சுவாரஸ்யத்தைத் தாண்டி இன்னும் கொஞ்சமேனும் கவனத்துடனும் முதிர்ச்சியுடனும் அணுகியிருக்கலாம்.

படத்தின் முடிவு எதைநோக்கி செல்கிறது என்பது தெரிந்தபிறகும் நீள்கிற காட்சிகள் கொஞ்சம் அயர்ச்சியை ஏற்படுத்துகின்றன. இரண்டரை மணிநேரம் இந்தக் கதைக்கு டூ மச் பாஸ்!

எளிய கார் டிரைவர் ஒருவரின் வாழ்க்கையைப் படமாக்கிய விதம் நன்றாக இருந்தாலும், வாழ்வில் முன்னேற விரும்புகிற மிடில் கிளாஸ் குடும்பங்களின் முன் இருக்கிற வாய்ப்புகளைக் காட்டிய விதமும், அதை அந்த கதாபாத்திரங்கள் அணுகிய விதமும் இன்னும் கொஞ்சம் அழுத்தமாக இருந்திருக்கலாம்.

பாத்திரத் தேர்வு, நடிப்பு என டாப் கியரில் கிளம்பும் 'கார்மேனி செல்வத்தை' திரைக்கதையில் தடுமாறாமல் பார்த்துக்கொண்டு, கதையின் ஆழத்திலும் தெளிவாகப் பயணிக்க வைத்திருந்தால் நாமும் சக பயணியாக நெகிழ்ந்திருக்கலாம்.

நீளிரா விமர்சனம்: போர் குறித்த முக்கியமான அரசியல் படைப்பு - இது பதைபதைக்க வைக்கும் ஈழத்து சினிமா!