आरसीबीने आयपीएल स्पर्धेच्या 19 व्या मोसमातील एकूण अकराव्या आणि आपल्या मोहिमेतील दुसऱ्या सामन्यात धमाका केला. आरसीबीने चेन्नई सुपर किंग्स विरुद्ध एम चिन्नास्वामी स्टेडियममध्ये इतिहास घडवला. आरसीबीच्या फलंदाजांनी चेन्नईच्या गोलंदाजांची जोरदार धुलाई केली. आरसीबीच्या पहिल्या 5 फलंदाजांनी चौफेर फटकेबाजी केली. तर अखेरच्या क्षणी कॅप्टन रजत पाटीदार आणि ऑलराउंडर टीम डेव्हीड या दोघांनी धावांचा पाऊस पाडला. दोघांनी दिलेल्या फिनिशिंग टचच्या जोरावर आरसीबीने 20 ओव्हरमध्ये 3 विके्टस गमावून 250 धावा केल्या. आरसीबीने यासह चेन्नई विरुद्ध 4 मोठे विक्रम आपल्या नावावर केले. आरसीबीने काय काय केलं? हे आपण सविस्तर जाणून घेऊयात.
विराट कोहली आणि फिलीप सॉल्ट या दोघांनी आरसीबीला आश्वासक सुरुवात मिळवून दिली. दोघांनी 37 धावांची सलामी भागीदारी केली. आरसीबीने विराट कोहली याच्या रुपात पहिली विकेट गमावली. विराटने 18 बॉलमध्ये 28 रन्स केल्या. त्यानंतर फिलीप आणि देवदत्त पडीक्कल या दोघांनी दुसऱ्या विकेटसाठी 37 चेंडूत 56 धावा जोडल्या. चेन्नईने आरसीबीला फिलीपच्या रुपात दुसरा झटका दिला. फिलीपने 30 बॉलमध्ये 46 रन्स केल्या.
आरसीबीच्या फलंदाजांनी तिसऱ्या विकेटसाठीही अर्धशतकी भागीदारी केली. रजत पाटीदार आणि देवदत्त पडीक्कल या दोघांनी चेन्नईच्या गोलंदाजांची धुलाई करत अवघ्या 21 बॉलमध्ये 58 रन्स जोडल्या. आरसीबीने देवदत्त पडीक्कल याच्या रुपात तिसरी विकेट गमावली. देवदत्तने 29 बॉलमध्ये 2 सिक्स आणि 5 फोरसह 50 रन्स केल्या.
त्यानंतर रजत आणि डेव्हीड या दोघांनी चेन्नईच्या गोलंदाजांना बॅटने चोपला. यात डेव्हीडने सर्वाधिक योगदान दिलं. दोघांनी चौथ्या विकेटसाठी 35 बॉलमध्ये नॉट आऊट 99 रन्सची पार्टनरशीप केली. रजतने 19 बॉलमध्ये 6 सिक्स आणि 1 फोरसह 48 रन्स केल्या. तर टीमने 25 चेंडूत 8 षटकार आणि 3 चौकारांच्या मदतीने नाबाद आणि सर्वाधिक 70 धावा केल्या. आरसीबीने अशाप्रकारे 250 धावांपर्यंत मजल मारली.
