RCB vs CSK Marathi News: रॉयल चॅलेंजर्स बंगळुरू विरुद्ध चेन्नई सुपर किंग्स संघात इंडियन प्रीमियर लीग २०२६ (IPL 2026) स्पर्धेतील ११ वा सामना खेळला जात आहे. हा सामना बंगळुरूच्या घरच्या मैदानात एम चिन्नास्वामी स्टेडियमवर खेळवला जात आहे.

या सामन्यात विराट कोहलीला (Virat Kohli) सामन्याच्या सुरुवातीलाच मोठा धक्का बसला असता, पण तो आऊट होता होता वाचला. त्यामुळे अनुष्का शर्माने (Anushka Sharma) दिलेली रिऍक्शन व्हायरल होत आहे.

झाले असे की चेन्नई सुपर किंग्सने नाणेफेक जिंकून प्रथम गोलंदाजी करण्याचा निर्णय घेतला होता. त्यामुळे प्रथम फलंदाजीसाठी उतरलेल्या रॉयल चॅलेंजर्स बंगळुरू संघाकडून विराट कोहली आणि फिल सॉल्ट यांनी डावाची सुरुवात केली. पण त्यांना पहिल्या दोन षटकात मोठा शॉट खेळताना आला नव्हता.

यानंतर तिसऱ्या षटकात तिसऱ्या चेंडूवर विराटने मोठा शॉट खेळला, त्यावेळी चेंडू मिडऑनला गेला होता. हा झेल घेण्यासाठी शिवम दुबे (Shivam Dube) धावत आला, पण त्याच्या हातून अगदी सोपा झेल सुटला. यावेळी स्टेडियममध्ये जल्लोष झाला.

त्याचवेळी कॅमेरा विराट कोहलीची पत्नी अनुष्का शर्माकडे वळाला. चेंडू ज्यावेळी दुबेच्या हातून सुटला, त्यावेळी अनुष्का आधी मोठा शॉट मारला म्हणून खूश होती, पण जसं तिला कळालं की झेल सुटला, तेव्हा ती चकीत झाल्याची दिसली. तिने दोन्ही हात तोंडावर ठेवले होते. या क्षणाचा व्हिडिओ व्हायरल होत आहे.