मुंबई : वांद्रे कुर्ला संकुलातील (BKC) वाहतूक कोंडीचा प्रश्न सोडविण्यासाठी, कुर्ला रेल्वे स्थानक आणि वांद्रे रेल्वे स्थानकावरून बीकेसीत पोहोचणे सोपे व्हावे यासाठी मुंबई महानगर प्रदेश विकास प्राधिकरणाने (MMRDA) पॉड टॅक्सी प्रकल्प (Pod Taxi) हाती घेतला आहे. वांद्रे रेल्वे स्थानक ते कुर्ला रेल्वे स्थानक व्हाया बीकेसी अशा 8.8 किमीच्या पॉड टॅक्सी मार्गिकेच्या कामाचे भूमिपूजन करण्यात आलं.
काम सुरू झाल्यापासून तीन वर्षांत हा प्रकल्प पूर्ण करून पॉड टॅक्सी सेवेत दाखल करण्याचा निर्णय घेण्यात आला आहे. त्यामुळे बीकेसीमध्ये 2029 मध्ये पॉड टॅक्सी धावताना दिसणार आहे.
- मुंबईतील बीकेसी परिसरात सुरू होणारा पॉड टॅक्सी प्रकल्प वाहतूक व्यवस्थेत मोठा बदल घडवणारा असेल.
- एमएमआरडीएकडून हा प्रकल्प राबवला जाणार आहे.
- बीकेसीमध्ये दररोज 4 ते 6 लाख लोकांची ये-जा होते. अशात, लास्ट माईल कनेक्टिव्हिटी हा मोठा प्रश्न.
- अशात, पूर्णपणे ड्रायव्हरलेस पॉड टॅक्सी प्रणाली सुरू करण्यावर भर देण्यात येत आहे.
- एकूण प्रकल्पाची लांबी 8.8 किमी असून त्यामध्ये 38 स्थानके असतील. एका पॉड टॅक्सीमध्ये 4 ते 6 प्रवासी प्रवास करु शकणार.
- प्रत्येक 15 ते 30 सेकंदांनी सेवा उपलब्ध असणार, ज्यात 40 किमी / तास वेगाने पॉड टॅक्सी धावणार.
- सुरुवातीला प्रवासी भाडे 21 रुपये प्रति किमी राहण्याची शक्यता. पब्लिक प्रायव्हेट पार्टनरशीपद्वारे प्रकल्प पूर्ण केला जाणार.
- पॉड टॅक्सीनं बीकेसीतील वाहतूक कोंडी कमी होण्यास मदत होणार.
- मेट्रो, बस आणि रेल्वेला देखील पॉड टॅक्सीची जोडणी मिळणार.
- प्रकल्पाचा खर्च जवळपास 1 हजार कोटींपर्यंत असल्याची माहिती.
मुंबईकरांसाठी मंगळवारचा दिवस खास ठरला. कारण राज्याचे मुख्यमंत्री आणि दोन्ही उपमुख्यमंत्र्यांच्या हस्ते मुंबईतील अनेक विकासकामांचं लोकार्पण आणि भूमिपूजन पार पडलं. यापैकीच एक होता दहिसर ते काशीगाव मेट्रो 9 प्रकल्पाच्या पहिल्या टप्प्याच्या उद्घाटनाचा कार्यक्रम. 2018 साली या प्रकल्पाचं भूमिपूजन झालं होतं. त्यानंतर आज मुंबई आणि मीरा भाईंदरला जोडणाऱ्या मेट्रो 9 प्रकल्पाच्या या पहिल्या टप्प्याचं उद्घाटन पार पडलं. मेट्रो 7 ला जोडणारी ही मार्गिका लवकरच पूर्ण करू असं आश्वासन यावेळी मुख्यमंत्री देवेंद्र फडणवीसांनी दिलं.
ही बातमी वाचा:
