अजित पवार यांच्या अपघाती निधनानंतर बारामती विधानसभा पोटनिवडणुकीच्या पार्श्वभूमीवर राजकीय घडामोडींना वेग आला आहे. उपमुख्यमंत्री सुनेत्रा पवार यांनी या निवडणुकीसाठी उमेदवारी अर्ज दाखल केला असून, ही निवडणूक बिनविरोध व्हावी अशी भूमिका अनेक पक्षांकडून मांडली जात आहे. बारामती हा अजित पवार यांचा बालेकिल्ला मानला जात असल्याने, त्यांच्या निधनानंतर निवडणूक बिनविरोध घेण्याची परंपरा पाळावी, अशी भावना व्यक्त होत आहे. सुनेत्रा पवार यांनीही विविध पक्षांच्या नेत्यांशी चर्चा करून ही निवडणूक बिनविरोध व्हावी, अशी विनंती केली होती. काही पक्षांनी यास सकारात्मक प्रतिसाद दिल्याचे सांगितले जात आहे. मात्र, काँग्रेसने या निवडणुकीत उमेदवार देण्याचा निर्णय घेतला आहे. काँग्रेस प्रदेशाध्यक्ष हर्षवर्धन सपकाळ यांनी बारामतीतून आकाश मोरे यांची उमेदवारी जाहीर केली आहे. उमेदवारी मागे घेण्याची विनंती करण्यात आल्यानंतरही काँग्रेसने आपली भूमिका कायम ठेवली आहे. दरम्यान, काँग्रेसने राष्ट्रवादी काँग्रेस अजित पवार गटासमोर अट ठेवली आहे. अजित पवार यांच्या मृत्यूच्या संदर्भात नोंदवलेल्या प्रकरणाचा गुन्हेगारी अंगाने तपास सुरू झाल्यासच उमेदवारी मागे घेण्याचा विचार करू, असे काँग्रेसकडून स्पष्ट करण्यात आले आहे.
या घडामोडींवर प्रतिक्रिया देताना राष्ट्रवादी काँग्रेस अजित पवार गटाचे नेते छगन भुजबळ यांनी सांगितले की, संबंधित प्रकरणाची कायदेशीर नोंद झाली असून, तपास यंत्रणा आपले काम करत आहेत. “पोलीस यंत्रणा तसेच DGCA यांसारख्या संबंधित संस्था या प्रकरणाचा तपास करत आहेत,” असे त्यांनी स्पष्ट केले. या सर्व घडामोडींमुळे बारामती पोटनिवडणुकीत बिनविरोध निवडीची शक्यता कमी होत असून, राजकीय संघर्ष अधिक तीव्र होण्याची चिन्हे दिसत आहेत.