Mukul Choudhary match winning innings vs KKR full story : आयुष बदोनीची विकेट पडली तेव्हा लखनौ सुपर जायंट्सच्या ६ बाद १२६ धावा झाल्या होत्या. अशा परिस्थितीत कोलकाता नाइट रायडर्सच्या विजयाच्या टक्केवारी ९५ इतकी होती, तर LSG च्या विजयाच्या ५ टक्केच अपेक्षा होत्या. पण, मुकुल चौधरी ( Mukul Choudhary) मैदानावर उभा राहिला आणि अनपेक्षित कामगिरी करून LSG ला रोमहर्षक विजय मिळवून दिला. विजयी धाव घेतल्यानंतर मुकुलूने आकाशाकडे पाहिले आणि हात जोडून देवाचे आभार मानले.

राजस्थानचा हा २१ वर्षीय फलंदाज मोठ मोठे षटकार मारण्यासाठी प्रसिद्ध होता आणि आज त्याने त्याच्या नावाची चर्चा का होतेय, हे दाखवून दिले. अजिंक्य रहाणे ( ४१), अंगकृश रघुवंशी ( ४५), कॅमेरून ग्रीन ( नाबाद ३२) व रोव्हमन पॉवेल ( नाबाद ३९) यांच्या खेळीने कोलकाताने ४ बाद १८१ धावांचा डोंगर उभा केला होता. त्यानंतर कोलकाताच्या गोलंदाजांनी चांगला मारा केला आणि १८व्या षटकापर्यंत सामन्यात पकड घेतली. आयुष बदोनी ३४ चेंडूंत ५४ धावा करून माघारी परतला अन् लखनौच्या विजयाच्या आशा मावळल्या होत्या.

पण, अशा वेळी मुकुल मैदानावर उभा राहिला. शेवटच्या २४ चेंडूंत ५४ धावा हव्या असताना मुकुल आवेश खानला सोबतिला घेऊन उभा राहिला. तरीही कोलकाताने १२ चेंडूंत ३० सामना असा अवघड ठेवला होता. पण, मुकुलने १९व्या षटकात कॅमेरून ग्रीनला १६ धावा कुटल्या आणि नंतर २०व्या षटकात दोन निर्धाव चेंडू खेळूनही रोमहर्षक विजय मिळवून दिला. पाचव्या चेंडूवर षटकार खेचला अन् शेवटच्या चेंडूवर एक धाव घेत LSGसाठी नायक ठरला...